Бағдодда молиявий фирибгарлик операциялари орқали ун харид қилиб, аҳолига қиммат сотаётган корхонага нисбатан жиноят иши қўзғатилди.
Бош прокуратура ҳузуридаги Департаментнинг Фарғона вилояти, Бағдод тумани бўлими томонидан ҳудудда унни аҳолига кафолатли тарзда ва арзон нархда етказиб беришда таъсир кўрсатаётган шахслар тўғрисида олинган маълумотлар тезкор гуруҳ тузилган ҳолда зудлик билан ўрганилган. Бу ҳақда Бош прокуратура Матбуот хизмати раҳбари Ҳаёт Шамсутдинов маълум қилди.
Айтилишича ўтказилган терговга қадар текширувда «I» оилавий корхонаси ва «I-L» кўп тармоқли фирмаси раҳбари И.М. товар хомашё биржаси орқали ун сотиб олишида шубҳа уйғонган. Ун нархларини ошириб, бошқа харидорларни савдога чиқариш мақсадида корхона ишчи ва хизматчилари ҳамда ўзининг қариндошлари номига 10 та оилавий корхона, 5 та якка тартибдаги тадбиркорликсубъектларини ташкил қилган.
Ташкил этилган номинал корхоналар ва якка тартибдаги тадбиркорлик субъектларини И.М. ўзи амалда юритиб, ушбу корхоналар раҳбарларининг хабардорлигисиз товар-хом ашё биржаси орқали дон маҳсулотлари корхоналаридан ун сотиб олиш учун брокерлик хизмати кўрсатиш тўғрисидаги шартномаларда имзоларни сохталаштириб тақдим этган.
Сўнгра И.М. брокерлар орқали сотиб олинган унларни олиб чиқиш учун ишончнома ҳамда бошқа ҳужжатлардаги имзоларни сохталаштириб, 2019 йилнинг октябрь ойидан 2020 йилнинг 15 апрелига қадар жами 18,3 млрд сўмлик 7 800 тонна унни олиб, нархларни сунъий равишда оширган ҳолда аҳолига сотаётганлиги аниқланган.
Мазкур ҳолатлар юзасидан И.М.га нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда. Жиноят иши вилоят прокуратураси томонидан алоҳида назоратга олинган.
Барча тадбиркорларни халқимизни синаётган ушбу даврда ҳамжиҳат бўлиб нархларни оширмасликларини, ҳалоллик ва қонунга итоаткорлик билан фаолиятларини амалга оширишга чақириб қоламиз, дейилади хабарда.
