Миллий масс-медиани қўллаб-қувватлаш ва ривожлантириш жамоат фонди васийлик кенгаши раиси Комил Алламжонов коронавирусга чалингани ва қандай қилиб даволангани ҳақида гапириб берди. Шунингдек у видеомурожаатида касалликни қандай кечиргани ҳақида сўзлаб бериб, ўз тажрибасидан келиб чиққан ҳолда айрим маслаҳатларни берган. У ўз ҳикоясини ўзининг Telegram-каналига жойлаган.
«Бир неча кун олдин менда ҳарорат кўтарилиши ва ҳолсизлик сезилди. Ҳароратимни ўлчаб кўрсам, 37,1 – 37,2. Жуда ҳам ҳолсизланиб, баданимда оғриқлар пайдо бўлди. Тест топшириб кўрсак, менда коронавирус инфекцияси борлиги аниқланди.
Шундан сўнг шифокорларга мурожаат қилдим. Ўпкамни МРТ қилишди, умумий қон таҳлили топширдим. Шунга асосан, менда енгил шаклдаги коронавирус кечаётганини айтишди ва мен ўз уйимда, оила аъзоларимдан алоҳида бўлган шароитда, улардан изоляцияда бўлган ҳолда ушбу касалликни бошимдан ўтказдим», – дейди Алламжонов.
Шунингдек у асосан гриппга чалинганда қилинадиган муолажаларни олиш тавсия этилганини айтган. Шунингдек, шифокорлар тавсиясига асосан ҳар икки соатда ҳароратини ўлчаб тургани, кунига 5-6 литргача сув ичгани, икки марта ҳарорати 39 даражадан ошгандагина иситмани туширувчи дори ичгани, бурун-томоғини чайиб тургани, С витамини қабул қилгани, уч кунда иситмаси ўтиб кетгач қисқа йўтал бошланиб, шифокорлар унга антибиотик ёзиб бергани ва 5 кун давомида антибиотик қабул қилгани, маълум вақт ҳид билиш қобилияти йўқолганини айтади.
«Видеомурожаатимдан асосий мақсад шуки, жуда кўпчилик шамолладим деб ўйлаб, коронавирусга чалинганини билмай қоляпти. Мен ана шундай ҳамюртларимизга аввало ваҳимага тушмасликка ва албатта шифокор кўригидан ўтишни тавсия қиламан. Бугун 12-кун, ўзимни яхши ҳис қиляпман. Йўтал, димоғим битиши тўхтади. Ҳарорат кўтарилиши уч кундан кейин ўтиб кетган
Мен кўпчилик қатори аввалига жиддий хавотирга тушгандим. Лекин ҳаммасидан ўтиб олдим. Худога шукр, ҳозир анча яхшиман, бутунлай тузалиб кетдим, оила аъзоларим билан мулоқотга киришдим. Арзимаган воситалар билан даволаниш мумкин бўлган жойда ўзингизни ўзингиз турли бошқа касалликларга ҳам чалинтириб қўйишингиз мумкин», – дейди у.
