Китоб тумани ҳокимлиги Ахборот хизмати маълум қилишича, туман санитария назорат инспекцияси бошлиғи С.Н. жамоат жойида ниқоб тақмасдан юрганлиги ҳолати бўйича баённома расмийлаштирилган тартиббузарлар Ю.Бўронова ва Р.Исматова(исм фамилияси ўзгартирилган)лардан маъмурий жарима қўлламаслик эвазига 800 минг сўм пулни пора тариқасида талаб қилган. Шу йилнинг 16 - июль кунида 200 минг пулни пора тариқасида олиб, қолган 600 минг пулни 17 - июль куни соат 13:15 да Китоб тумани марказидаги эски автошоҳбекат олдида олаётган вақтида қўлга тушган.
Айни пайтда унга нисбатан Ўзбекистон Республикаси Жиноят кодексининг 210 - моддаси 2- қисми "в" банди билан жиноят иши қўзғатилиб, эҳтиёт чораси қўлланилиб қамоққа олинган.
Шу ўринда, бир мулоҳаза беихтиёр шуурингизда ёлқинланади.Бутун мамлакатда пандемия сабабли кечаётган мураккаб вазиятда бу ҳолатни нима деб баҳолаш мумкин.Яъни, аҳоли саломатлиги учун масъул, давлатнинг бугунги кунда энг ишонган соҳа хизматчиси сифатида СНИ бошлиғининг ҳатти ҳаракатлари қандай мезонларга тўғри келади?
Халқимизда бор бўлган "Ҳамма тўй билан, бўри қўй билан"деган мақол мазмуни шумикан ёки?!
