Тошкент шаҳар ИИББ хабар беришича кеча, 21 июль куни соат 14.30 да 102 рақамига Чилонзор туманининг 3-кварталида яшовчи аҳолидан келиб тушган хабарга кўра, Чўпонота кўчасида илгари АҚШнинг Ўзбекистондаги Элчихонаси жойлашган бинонинг яқинида ўндан ортиқ ёшлар жанжаллашаётгани аниқланган.
Ҳодиса жойига Тошкент шаҳар ИИББ ППХ Бригадаси 4-батальони ходимлари етиб келишди. Патруль автомобилини кўрган ёшларнинг бир нечтаси қочиб кетишди, етти нафари эса қўлга олиниб, энг яқин ички ишлар бўлимига олиб келинди.
Қўлга олинганлардан бири – муқаддам судланган 28 ёшли Э.Ш. текширилганда унинг автомобилининг салонидан учта пичоқ, барсеткасидан эса 3 флакон “Тропикамид”, 1 флакон “Риноксил”, 6 таблетка “Селофен” топилди.
Ҳозирда Чилонзор тумани ИИО ФМБ 4-сон ички ишлар бўлими томонидан текширув ўтказилмоқда. Текширув давомида ҳодисанинг бошқа иштирокчиларининг шахслари аниқланиб, сўнг барча иштирокчиларнинг ҳатти-ҳаракатларига ҳуқуқий баҳо берилади.
