Бугун, 24 июль куни тахминан соат 11:00 ларда “Бухоро махсус сув кўрилиш” МЧЖ ходимлари Бухоро вилояти, Бухоро шаҳар А.Жомий кўчасида жойлашган янги қурилаётган кўп қаватли уйларнинг канализация қувурларини шаҳарнинг асосий канализация тизимига улаш ишларини олиб бораётган вақтида фожиа юз берди. Бу ҳақда ИИВ ҳузуридаги Тергов департаменти хабар қилмоқда.
Ишчилар 47 ёшли А.К. ва 45 ёшли С.Б., қувурларни монтаж қилиш жараёнида канализациядан чиқаётган газлардан заҳарланишлари оқибатида соғлигининг ёмонлашганлиги сабабли ҳушидан кетган. Уларнинг шериги 27 ёшли З.Ш., уларга ёрдам бериш мақсадида канализация қувурига тушган вақтида у ҳам канализациядан чиқаётган газлардан заҳарланиб ҳушидан кетган. Уни кўриб, уларнинг яна бир шериги 41 ёшли С.А., ёрдам бериш мақсадида ушбу қувурга тушиб заҳарланишдан ҳушидан кетган. Атрофда тўпланган аҳоли томонидан фақатгина С.А.,гина қутқариб қолинган бўлиб, унинг шериклари 47 ёшли А.К., 45 ёшли С.б. ва 27 ёшли З.Ш.,лар эса ҳодиса жойида канализациядан чиқаётган газлардан заҳарланиб вафот этган.
Ҳозирда фуқаро С.А., шифохонага ётқизилган.
Ҳодиса жойига тергов гуруҳи чиқиб, воқеа жойини кўздан кечириб, тергов олди суриштирув ҳаракатларини олиб бормоқда.
