Registon maydonida madaniy merosni ommalashtirish bo`yicha yakunlovchi deklarasiya qabul qilindi, deya xabar beradi Turizm va madaniy meros vazirligi.
Yakunlovchi hujjatda shunday deya ta`kidlangan: "O`zbekiston Respublikasi Prezidenti Shavkat Miromonovich Mirziyoevning bevosita tashabbusi bilan O`zbekistonda Yangi Renessans – Yangi Uyg`onish davrining poydevori qo`yilyapti, bu esa mamlakatimizda ma`naviy-ma`rifiy sohada tub o`zgarishlarni amalga oshirishda ham o`z ifodasini topmoqda".
Qayd etilishicha, olimlar O`zbekistonda gumanitar fan va madaniyat sohasida keng ko`lamli tadbirlar tashkil etilayotgani va amalga oshirilayotgani, davlat muzeylari faoliyatini takomillashtirish va 2017–2027-yillarda ularning moddiy-texnik bazasini mustahkamlash bo`yicha 10 yillik davlat dasturi qabul qilinganini alohida ta`kidlashgan.
Ma`lumot o`rnida, "O`zbekiston madaniy merosini o`rganish, saqlash va ommalashtirish bo`yicha Butunjahon jamiyatining olti yillik faoliyati davomida "O`zbekiston madaniy merosi" eksklyuziv xalqaro turkumining 60 ta jildi nashr etildi.
"O`zbekiston obidalaridagi bitiklar", "O`zbekiston fan va madaniyati olimlar asarlarida" turkumlarini nashr etish bo`yicha ishlar davom ettirilmoqda, 60 dan ortiq filmlar suratga olindi, O`zbekistonda va xorijda ko`plab media-forumlar o`tkazildi. Olim va tadqiqotchilar o`rtasida samarali muloqotni ta`minlovchi ushbu harakat dasturi O`zbekiston Respublikasi Prezidenti va Hukumati, qator xalqaro gumanitar tashkilotlar ko`magi bilan amalga oshirildi"- deyiladi deklarasiyada.
Eslatib o`tamiz, kongress davomida 100 dan ortiq ma`ruzalar o`qildi, davra suhbatlari, sessiyalar o`tkazildi.
Ma`lumot uchun, Kongress ishida 350 dan ortiq kishi qatnashdi. Bular: nomlari jahonga mashhur sharqshunos-olimlar, 6 nafar xalqaro tashkilotlar rahbarlari, 50 nafar taniqli xalqaro muzeylar direktorlari, 15 nafar akademiklar, 25 nafar professorlar, 22 nafar fan doktorlari, muzey xodimlari, madaniyat va san`atni yoritish sohasida faoliyat yuritayotgan OAV vakillari va O`zbekistonning madaniy merosini asrab-avaylash va o`rganish masalalari bilan qiziquvchi media vakillaridir.
Mavzuga doir:
VI Kongress: Tojikiston fondlarida o`zbekiston madaniy merosiga oid ko`plab osori atiqalar mavjud
Butunjahon VI kongressi sensasiyasi: 1311 yillik so`g`d libosi bugungacha saqlanib qolgan
