Сардоба фожиасига бугун (1 август куни) 3 ой тўлди. Гарчанд бу талафот унутилмаган, унга ҳеч ким бефарқ бўлмаган бўлса-да, энг кераклиги – Сардоба фожиасидан азият чеккан аҳоли учун ўша кун бугун гўёки узоқ бир ўтмишга айланган. Энди уларнинг юзларида афсус эмас, ҳаётдан мамнуният, давлатга, Президентга ишонч ва Яратганга шукр ифодаларини кўрасиз. Бироз аввал тошқиндан илк зарар кўрган Сардоба тумани “Қўрғонтепа” маҳалласи ҳамда Оқ олтин туманига “кўчиб борган” “Янги Тошкент” маҳалласи ҳақида фоторепортаж қилган эдик. Бу гал эса техноген офатдан зарар кўрган Сардоба тумани аҳолиси учун шу йилнинг 15 май куни давлатимиз раҳбари Шавкат Мирзиёев тамал тошини қўйган кўп қаватли уй-жой мажмуаларининг бугунги ҳолати ҳақида маълумот берамиз.
УМУМИЙ ЗАРАР ҲАҚИДА
Қурилиш вазирлиги Ахборот хизмати раҳбари Жамолиддин Қаландаровнинг “Даракачи”га маълум қилишича, талафотдан зарар кўрган ҳудудлардаги 63 та кўп қаватли уй тамомила яроқсиз ҳолатга келган, 44 та кўп қаватли уйлар (Оқолтин тумани “Саҳоват” маҳалласидаги 20 та, Мирзаобод тумани “Навбаҳор” маҳалласидаги 11 та, Сардоба тумани “Юртдош” ҳамда “Қўрғонтепа” маҳаллаларидаги 13 та) таъмирлаш бўйича лойиҳа олди ишлари амалга оширилиб, чуқур экспертизадан ўтказилган. Ҳисоб-китобларга кўра, кўп квартирали уй-жойларни таъмирлаш ва уларнинг туташ ҳудудини тиклаш ва ободонлаштириш учун жами 35,6 млрд.сўм (таъмирлаш учун 29,7 млрд.сўм, ободонлаштириш учун 5,9 млрд.сўм) сарфланиши белгиланган.
44 та кўп қаватли уйларнинг туташ ҳудудларини ободонлаштириш асносида:
Тошқини оқибатида уй-жойларига жиддий зарар етган фуқаролар учун жами 52,5 га ер майдони танланиб, 66 та, 2 640 та хонадонли кўп қаватли турар жой бинолари қуриляпти. Учта массивда кўп қаватли уй-жойлар қурилиши буюртмачи вилоят ҳокимлиги Ягона буюртмачи хизмати инжиниринг компанияси ва пудратчилар ўртасида тузилган умумий қиймати жами 855,4 млрд. сўмлик шартнома асосида олиб борилмоқда. Шу кунгача 3 та пудратчи корхонага 398,0 млрд. сўм маблағ ажратилган.
ТОПШИРИЛИШ МУДДАТЛАРИ
Талофат оқибатларини бартараф қилиш бўйича тармоқ жадвали ва чора-тадбирлар режасига кўра, 2020 йилнинг 1 августига қадар кўп қаватли уй-жойларни таъмирлаш яъни, бу ерда шу вақтгача мавжуд бўлган икки қаватли уй-жойлар назарда тутиляпти ва 25 августга қадар туташ ҳудудларини ободонлаштириш ишларини якунлаш режалаштирилди.
“Gold step invest” МЧЖ меҳнат мухофазаси ва техника хавфсизлиги бўйича муҳандиси Бобошер Баратовнинг келтиришича, Сардоба туманида қад ростлаётган 5 қаватли уй-жой мажмуалари ҳамда мактаб ва боғчалар аҳолига куз-қиш мавсумигача топширилиши режалаштирилган.
ҚУРИЛИШГА МАСЪУЛ ПУДРАТЧИ ТАШКИЛОТЛАР
“Gold step invest” МЧЖ — Сардоба тумани “Дўстлик”, “Қўрғонтепа” ва “Юртдош” маҳаллаларида уйлари яроқсиз ҳолга келган 1480 та хонадон эгалари учун 37 та кўп қаватли уй-жойлар;
“White City Construction” МЧЖ — Мирзаобод тумани “Ҳақиқат” маҳалласи, Оқолтин туманининг “Шодлик”, “Саҳоват”, “Ахиллик” ва Мирзаобод туманининг “Дўнгариқ”, “Мирзачўл”, “Ҳақиқат” маҳаллаларида уйлари яроқсиз ҳолга келган 800 та хонадон эгалари учун 20 та кўп қаватли уй-жойлар;
“Silver Flex” МЧЖ — Оқолтин туманининг “Шодлик” ва Мирзаобод туманининг “Навбаҳор” маҳаллаларида уйлари яроқсиз ҳолга келган 360 та хонадон эгалари учун 9 та кўп қаватли уй-жойлар қурилиши учун масъул.
ҚУРИЛИШ СИФАТИ ВА АФЗАЛЛИКЛАРИ
Бобошер БАРАТОВ, “Gold step invest” МЧЖ меҳнат мухофазаси ва техника хавфсизлиги бўйича муҳандиси:
— “Gold step invest” МЧЖ томонидан қурилаётган кўп қаватли хонадонлар 2-3 хонали уйлардан ташкил топган. Қурилишда қуйма темир-бетон технологияси ва қишда иссиқ, ёзда салқинликни таъминловчи базальт материалли панеллардан фойдаланилмоқда. Бу билан иссиқлик-энергиясини тежаш имкони яратилиб, уйлар сифатли бўлади.
Сардорбек Раҳмонқулов
