Бу ҳақда Россия фанлар академияси Иммунология ва физиология институти раҳбари Валерий Черешнев сўзлаб берди, деб хабар беради РИА Новости. Унга кўра, Россиялик олимлар коронавирусни ўпкага сунъий нафас бермасдан даволаш усулини топган.
Черешневнинг сўзларига қараганда, гелий-кислород қоришмаси ингаляцияси коронавирус билан касалланган оғир аҳволдаги 50 нафар беморда қўлланилган. Ингаляциядан кейин уларнинг фақат биттасига ўпкага сунъий нафас бериш аппарати қўллашга тўғри келди. Хусусан, мутахассислар ингаляция аппаратини такомиллаштириб, ҳавонинг алоҳида кириш ва чиқиш тизимларини яратди.
Черешнев ушбу тажрибани ижобий деб баҳолади. «Ҳозир ишлаб чиқариш кетяпти», — деб қўшимча қилди у. Олим, шунингдек, ўпкага сунъий нафас беришнинг организм учун катта оғирлик эканига эътибор қаратди. Унинг сўзларига кўра, 90-95 даражада қиздириладиган гелий-кислород қоришмаси ўпкага сунъий нафас бериш аппаратидан анча қулай экан.
