Муҳаммаджон Обидов ўзининг “Фейсбук”даги саҳифасида шифохонада даволанаётгани ҳақида ёзди: “Оллоҳнинг синови экан, 17 сентябрдан буён пневмония касаллиги билан шифохонадаман. Бир оз жиддийроқ келди. Ўпканинг 45 фоизи шикастланган. Шуҳрат Ғаниевни кузатиш, Хайрулло Бозоровни тайинлаш маросимида ҳам иштирок этолмадим. Врачлар яхши қарашяпти. Аммо ўзгариш жуда суст.
Ҳокимликнинг Ахборот хизматини бир кун ҳам эгасиз қолдириб бўлмайди. Қолаверса, янги ҳоким иш бошлади. Шунинг учун бугун бир қарорга келдим: Фарғона вилояти ҳокимлиги Ахборот хизмати раҳбарлигига истеъфо бердим. Вилоят ҳокими Хайрулло Бозоров билан илгари ҳам, ҳозир ҳам учрашмаганман. Шундай бўлсада касаллигимни инобатга олиб, аввал тузалиб чиқсин, ёки телефонда бир сўзлашай демасдан истеъфоимни қабул қилибдилар. Хурсанд бўлдим.”
Муҳаммаджон Обидов Фарғона вилояти ҳокими Шуҳрат Ғаниев билан астойдил, фидойилик ва садоқат билан ишлаганини таъкидлаган. У тармоқ фойдаланувчиларидан истеъфосини бошқача талқин қилмасликни, қўлларидан келса, дуо қилишини сўрамоқда.
