Ўзбекистон Республикаси Фавқулодда вазиятлар вазирлиги тизимида ҳам Ўзбек тили байрами кунига бағишланган тадбирлар карантин талабларига амал қилинган, ижтимоий масофа сақланган ҳолда фаоллик билан ташкиллаштириб келинмоқда.
Мазкур ҳафта вазирлик тизимида Ўзбек тили байрами куни ҳафталиги бўлди. Жорий йилнинг 2020 йил 13 октябридан15 октябрига қадар ФВВ марказий аппарати, вазирлик Академияси, Махсус вазифаларни бажарувчи республика қутқарув маркази, ФВВ Академияси ҳузуридаги Фуқаро муҳофазаси институти ва яна қатор ҳудудий, таркибий тузилмаларда шоир ва ёзувчилар, тилшунос ва адабиётшуносларни жалб этган ҳолда маънавий-маърифий тадбирлар ўтказилди.
Ўтган куни ФВВ Академиясида бўлиб ўтган маърифий тадбирда Ўзбекистон Ёзувчилар уюшмаси аъзоси, “Шарқ юлдузи” ва “Звезда Востока” журналлари бош муҳаррири, таниқли шоир Сирожиддин Рауф, Ўзбекистон Ёзувчилар уюшмаси аъзоси, Ўзбекистонда хизмат кўрсатган маданият ходими, зукко шоир Бобур Бобомурод ҳамда шоир ва олим Дилшод Ражаблар иштирок этди.
Уларда вазирлик тизими ҳарбий хизматчилари, хизматчи ходимлари, қутқарувчилар тадбирларга ташриф буюрган таниқли ижодкорлар ва олимларнинг бир-биридан қизиқарли маърузалари, она тилига бағишлаб ёзилган сермазмун ижод намуналаридан баҳраманд бўлиб, давлат тилига оид билимларини янада мустаҳкамладилар.
Тадбирлар давомида вазирнинг давлат тили масалалари бўйича маслаҳатчиси Баҳодир Валиев ҳозирги кунда Ўзбекистон Республикаси Вазирлар Маҳкамасининг Давлат тилини ривожлантириш департаменти ва унинг жойлардаги вакиллари, яъни вазирлик, идораларда фаолият юритаётган давлат тили масалалари бўйича маслаҳатчилар томонидан идораларда она тилимизни ривожлантириш, давлат тилида иш юритишни ташкил қилиш юзасидан амалга оширилаётган ишлар хусусида атрофлича маълумотлар бериб ўтди. Департамент ва ҳамкор муассаса, ташкилотлар томонидан нашрдан чиқарилган “Ўзбек тилининг изоҳли луғати”, “Давлат тилида иш юритиш” китобларига алоҳида урғу бериб, уларнинг давлат тилида иш юритишдаги ўзига хос аҳамияти ҳақида фикрлар билдирган ҳолда, мазкур манбаларни амалиётда фаол қўллаш зарурлигини қайд этди.
Учрашувларда ҳарбий хизматчилар, хизматчилар, курсант ва қутқарувчилар ҳам сўз олиб, эл ардоғидаги шоирларнинг ижод намуналаридан ёд айтдилар, ўзларини қизиқтирган саволларга атрофлича жавоблар олдилар.
Қизғин мунозара ва фикр-мулоҳазаларга бой бўлган тадбирлар барчада катта таассурот қолдирди.
21 октябрь – Ўзбек тили байрами куни ФВВнинг бир гуруҳ курсантлари, ҳарбий хизматчи ва қутқарувчилари Адиблар хиёбонида бўлиб, ғазал мулкининг султони, ўзбек адабий тилининг асосчиси ҳазрат Алишер Навоий ҳамда Бердақдек улуғ аллома ва шоирларнинг пок сиймосига ҳурмат бажо келтирилди пойига гуллар қўйдилар. Шоир ва ижодкорлар иштирокида мушоиралар ташкил қилиб, сўз санъати, адабиёт ва маънавият дурдоналаридан баҳраманд бўлдилар. Тадбирлар ҳозирда давом этмоқда.
Фарҳоджон Хожаев,
Ўзбекистон Республикаси
Фавқулодда вазиятлар вазирлиги
Академияси ўқитувчиси, капитан
