COVID-19 тарқалишини жиловлаш мақсадида жорий этилган ижтимоий ва иқтисодий чекловларни барқарор бекор қилиш дунё бўйича келаси йилнинг ўрталаридан бошланади, деб хабар берди Спутник манбаси Oxford Economics аналитик компанияси маълумотларига таяниб.
Дунёнинг турли нуқталарида иқтисодий ўсишга қайтиш аҳолини коронавирусга қарши умумий эмлаш ва иммунлашга боғлиқ тарзда кечади. Еврокомиссия раҳбари Урсула фон дер Ляйен пайшанба куни бўлиб ўтган Париж тинчлик форумида ана шундай фикр билдирди. Қайд этилишича, вакцинация комплекс дастури кўплаб ойларни олади, бу эса пандемия туфайли киритилган чекловларнинг барқарор ва тизимли бекор қилиниши фақатгина 2021 йилнинг ўрталаридан бошланади, деган фикрни тасдиқлайди.
Германия биотехнологик компанияси BioNTech ва АҚШ фармацевтика гиганти ҳисобланган Pfizer сал олдин учинчи фаза синовлари муваффақиятли ўтгани ҳақида хабар берганди. Вакцина COVID-19нинг олдини олишда 90 фоиздан ортиқ самарадорлик кўрсатган. АҚШ вакцинани рўйхатга ўтказиш учун аризани ноябрь ойида беришни режалаштирмоқда. Эътироф этилишича, Pfizer-BioNTech вакцинаси юқори даражада самарадор эканлиги ҳақидаги хабарлар, ҳозирча дунё иқтисодиёти нормал ҳолати тикланишида энг катта одимдир. Бироқ экспертларнинг фикрича, нормал ҳаётга қайтиш, эҳтимол, узоқ давом этиши мумкин.
Агар қатор бошқа вакциналар пайдо бўлмаса, кўриниб турибдики, дунё аҳолисининг аксарияти келаси йилда ҳам вакцина ололмайди. Вакцина тарқатилиши билан боғлиқ маълум қийинчиликларга қўшимча равишда, Pfizer компанияси шуни маълум қилдики, жорий йил якунига қадар препарат фақат 50 миллион дозада, келаси йил эса 1,3 миллиард дозада чиқарилади.
Бу миқдор 2021 йилнинг якунига келиб 675 миллион кишини ёки дунё аҳолисининг 8 фоизини вакциналаш учун етарли, холос.
Маълумот учун, бугунги кунда Россияда коронавирусга қарши учта вакцина мавжуд. Улар Гамалея номидаги институтнинг "Спутник V", "Вектор" илмий марказининг "ЭпиВакКорона" ва Россия Фанлар академиясининг Чумаков номидаги марказда яратилган вакциналардир.
