Тошкент метрополитени айрим бекатларининг чиқиш вестибюллари 24 сентябрдан номаълум муддатга ёпилган эди. Сабабини эса Транспорт вазирлиги Матбуот хизмати "ишлаб чиқариш эҳтиёжлари" дея кўрсатган эди.
Энди сарлавҳага қайтсак. Метрога тушишингиз билан "Илтимос, ёш болали, ногирон ва ёши катталарга жой беринг" деган сўз такрорланаверади. Ўзингизчи? Кўплаб вестибюлларни ёпиб ташлаб, йўловчилар узоғини яқин қилиш ўрнига, яқинини узоқ қилиб юбормаяпсизми? Биздек ёшларку майли, лекин сиз ҳурмат қилишни илтимос қилаётган ёш болали, ногирон ва ёши катталар метрога тушса, вагондан тушиб кўчадаги керакли вестибюлга чиққунча қўшимча 500-800 метр масофани пиёда, зиналарга чиқиб-тушиб сарсон босиб ўтаётганини кўрмаяпсизми?
Зиналардаги ногиронлар учун чиқиб-тушиш шароитининг йўқлиги алоҳида мавзу. Қарийб икки ой бўлди. Қачон бу сарсонгарчиликни тўхтатасиз?
Келинг, биргина "Мирзо Улуғбек" метро бекатини олайлик. "Миллий" стадион тарафдан чиқмоқчи бўлган йўловчи (қариялар, ногиронлар, ҳомиладорлар, беморлар ҳам) кўчага чиққунча 3 мартта зинадан кўтарилади. "Миллий" стадион тарафга ўтиш учун эса яна бир йўл ўтказгичдан чиқиб-тушиш керак бўлади.
Катта эҳтимол билан бу муносабатга "қатнов кам бўлган вестибюллар ёпилган" дея изоҳ беришингиз мумкин. Аммо, лекин, бироқ, эй барака топгурлар, ёпиқ вестибюлларинигизнинг кўчадан тушиш қисмига уларнинг ёпиқлигини билдирувчи "маълумот тахтачаси"ми жойлаштириб чиқинг. Ишдан қайтишда ҳар кун кимдир ўша ёпиқ "ертўлага" тушиб, хафсаласи пир бўлиб қайтиб чиқиб келаётганларини кўряпмиз.
Сиз сўраётган ҳурматга ўзингиз ҳам амал қилинг. Совуқ, ноқулай кунларда сарсонгарчилик яна ҳам сезиляпти. Ўйлаймизки, эътирозимизни эътибордан четда қолдирмайсиз.
Сардорбек Раҳмонқулов
