Бугун, 30 ноябрь куни Ўзбекистон Республикаси Олий суди ва Ўзбекистон Республикаси Коррупцияга қарши курашиш агентлиги ҳамкорлигида “Одил судловни таъминлаш – Ўзбекистонни коррупциядан холи ҳудудга айлантиришнинг муҳим омили” мавзусида конференция ўтказилди. Мазкур конференция Ўзбекистон Республикаси Президенти ҳузурида 2020 йил 30 июнда кенгайтирилган тарзда ўтказилган видеоселектор йиғилишининг 49-баёни ижроси юзасидан ишлаб чиқилиб, Ўзбекистон Республикаси Администрацияси томонидан 2020 йил 19 августда тасдиқланган Тошкент шаҳрида жиноятларни жиловлаш, жиноятчилик профилактикасини янада такомиллаштириш, одил судловни таъминлаш ва коррупциядан ҳоли ҳудудга айлантириш бўйича Йўл харитаси доирасида ташкил этилди.
“9 декабрь – Халқаро коррупцияга қарши кураш куни” арафасида, Агентликнинг “Антикоррупция ҳафталиги” доирасида ўтказилган мазкур тадбирда Олий суд, Коррупцияга қарши курашиш агентлиги, Судьялар олий кенгаши, Олий Мажлис Қонунчилик палатаси, “Юксалиш” умуммилий ҳаракати вакиллари иштирок этди.
“МАХСУС ЭКСПЕРТЛАР ИМКОНИЯТЛАРИДАН ОҚИЛОНА ФОЙДАЛАНИБ, КУТИЛГАН НАТИЖАЛАРГА ЭРИШИШ МУМКИН”
Робахон Маҳмудова, Ўзбекистон Республикаси Олий суди раисининг биринчи ўринбосари:
- Тадбир ўта долзарб мавзуга бағишланган. Чунки одил судловни таъминлаш ва коррупцияга қарши самарали курашиш, аҳолининг тинчлик-фаровонлигини, ижтимоий адолат ва мамлакат тараққиётини таъминлашда муҳим аҳамиятга эга. Мамлакатимизда инсон ҳуқуқ ва эркинлигини ишончли ҳимоялашни таъминлаш, фуқароларни одил судловга эришиш даражасини ошириш, суд-ҳуқуқ тизимини янада такомиллаштиришга йўналтирилган тизимли чоралар кўрилди.
Бугунги кунда ислоҳотлар самараси – қонун устуворлигини таъминлаш, коррупцияга қарши қатъий курашиш, институционал салоҳиятни юксалтириш ва кучли демократик институтларни шакллантириш каби ўта муҳим омиллардан иборатдир. Тўлиқ коррупциянинг олди олинмаслиги жамиятдаги тармоқларнинг ривожланмаслигига олиб келади. Одил судлов ва суд тизимининг мустақиллигини таъминлаш ўз навбатида мамлакатимизнинг халқаро рейтинглардаги ўрнини мустаҳкамловчи халқаро асосий индикаторлардан бири ҳисобланади. Ўзбекистонда коррупцияга қарши курашиш юзасидан ижобий ўзгаришларни БМТнинг махсус маърузачиси Диего Гарсиа–Саян жаноблари ҳам алоҳида эътироф этдилар.
Бугунги кунда қўлга киртилган ютуқларга қарамай, коррупцияга қарши курашиш бўйича ишларни доимий равишда амалга ошириб бориш, айниқса бу борада соҳадаги махсус экспертларни жалб қилиб, уларнинг имкониятларидан оқилона фойдаланиб, кутилган натижаларга эришиш мумкин.
“IT-ТЕХНОЛОГИЯЛАРНИ АМАЛИЁТГА ОЛИБ КИРИШ БИЛАН ҲАМ КОРРУПЦИЯНИНГ ОЛДИНИ ОЛАМИЗ”
Ҳожи-Мурод Исоқов, Ўзбекистон Республикаси Судьялар олий кенгаши раисининг ўринбосари:
- Гарчи Судьялар олий кенгаши бевосита коррупцияга қарши курашиш ташкилотлари тоифасига кирмаса-да, лекин билвосита қилаётган барча ҳаракатларимиз айнан коррупциянинг олдини олишга қаратилган. Яъни, судьялар ҳамжамиятининг органи сифатида иқтидорли, коррупцияга мойил бўлмаган, ҳозирги замон талабларига жавоб берадиган янги судьялар корпусини ташкил этишимиз керак. Буни шакллантириш бинобарида коррупциянинг олдини олиш, коррупциявий элементларни судьялар корпусида пайдо бўлиш имкониятларига чек қўйишимиз керак. Судьялар корпусини шакллантиришда муаяйн механизмларга асосланамиз. Хусусан, бугунга қадар амалга ошириб келинаётган барча ишларимиз қаторида янги бир янгиликлар киритилмоқда. Масалан, илк бор судьяликка тавсия қилинган номзодларни психологик тестлардан ўтказиш бўйича ишлар олиб бориляпти. Бу психологик тестдан ўтказиш дунёнинг барча мамлакатларидаги каби амалга оширилади. Унда бўлғуси судьянинг коррупцияга қай даражада мойиллиги аниқланади.
Бундан ташқари, IT-технологияларни суд амалиётида қўллаш имкониятларини амалиётга олиб кириш билан ҳам коррупциянинг олдини оламиз. Масалан, Олий суд томонидан бир неча йилдан буён амалга оширилаётган суд ишларини электрон тақсимлаш доирасидаги электрон IT-технологияларни суд жараёнида кўпроқ ишлатишни олдимизга мақсад қилганмиз.
Яқинда Қозоғистон судьялар олий кенгаши ташаббуси билан Халқаро конференция ўтказилди. Унда ҳам IT-технологиялар коррупцияни бартараф этувчи муҳим омиллардан бири экани эътироф этилди.
Биламизки, ҳар қандай коррупция қонунчиликдаги бўшлиқ ёки муайян механизмларнинг йўқлиги натижасида ҳосил бўлади. Шу боис ҳуқуқий майдонни коррупциядан тозалаш бу олдимиздаги бош масалалардан бири. Олий суд билан ҳамкорликда, қолаверса янги тузилган Коррупцияга қарши курашиш агентлиги билан ўзаро муайян режаларни амалга оширяпмиз. Бу режалар янада кенгайтирилиб, ўзининг ижобий натижаларини беради, деган умиддамиз. Чунки тизимни коррупциядан ҳоли қилмай туриб, одил судловни таъминлаш мумкин эмас. Демак, одил судловни таъминламай туриб, Ўзбекистонни коррупциядан ҳоли ҳудудга айлантириб бўлмайди. Боиси ҳар қандай коррупциявийликка одил суд доирасида ечим қўйилади. Шунинг учун ҳам бу устувор масала ҳисобланади.
Садоқат АЛЛАБЕРГАНОВА
