Аввалроқ, “Ўзбекгидроэнерго” акциядорлик жамияти ҳамда Президент Администрацияси ҳузуридаги Ахборот ва оммавий коммуникациялар агентлиги ҳамкорлигида ОАВ ходимлари учун ташкил этилган пресс-турда 38 йил мобайнида қурилган тўғон: ҳам сув, ҳам электр мавжуд эканлиги ҳақида хабар берган эдик.
Эндиликда, Сурхондарё вилоятининг Сариосиё туманидаги "Зарчоб-1" кичик ГЭСини қуриш лойиҳаси амалга оширилаётгани ҳақида хабар берамиз.
Шунингдек, ушбу лойиҳалар ишга тушиши орқали энергия олиш қуввати жами 250 мегаваттга етказилади ва “Зарчоб-1” кичик ГЭСга 2 та гидроагрегат ўрнатиш белгиланган бўлиб, унинг умумий қуввати 37,4 МВтни ташкил этади.
"Toʼpolаng HPD Platinum” МЧЖ бош муҳандиси Нуриддин Салимов таъкидлашича:
— Ушбу қурилиш 2017 йил август ойида бошланган. Қурилишнинг умумий нархи 80,4 млн АҚШ доллар бўлиб, бизда жами 1100 киши ишлайди, қурилиш ишлари эса декабрь ойининг охирида якунланади ва ГЭС ишга тушиши билан яна 80 киши иш билан таъминланади. Шу билан бирга, Олтинсой, Сариосиё, Узун, Динов, Шўрчи Қумқўрғон, туманларига электр етказиб берилиши назорат қилинади.
Маълумот ўрнида айтиш жоизки, “Зарчоб-1” кичик ГЭСда қурилиш-монтаж ишлари якунланиб, ГЭС учун зарурий технологик қурилмалар ҳамда гидроагрегатлар хитойлик мутахассислар билан маҳаллий мутахассислар томонидан биргаликда монтаж қилинмоқда.
" Даракчи" мухбири
Марям САТТОРОВА
