Россиянинг Камчатка ўлкасида 21 та чўчқа гриппи билан касалланиш ҳолати қайд этилди. Бу ҳақда “Вести” нашри хабар бермоқда.
Беморларнинг бирортаси ҳам гриппга қарши эмланмаган. Шифокорлар аҳолига гриппнинг олдини олиш ҳақида огоҳлантирмоқда.
“22 январь ҳолатига кўра, 21 та H1N1 гриппига чалиниш ҳолати қайд этилди. Касалланганларнинг 18 нафари катталар, қолган учтаси болаларни ташкил этди. Беморларнинг аҳволи ўртача даражада баҳоланмоқда. Ўта оғир грипп ҳолатлари қайд этилмаган. Беморларнинг ҳеч бири гриппга қарши эмланмаган”, —деди Камчатка ўлкаси соғлиқни сақлаш вазири вазифасини бажарувчиси Марина Волкова.
Аксарият ҳолларда инфекция одамдан одамга ҳаво-томчи усули орқали юқади. Аҳолига жамоат жойларида ҳимоя ниқобларидан фойдаланиш ва шахсий гигиена қоидаларига риоя этиш тавсия этилмоқда.
