15-18 декабрь кунлари Тошкент шаҳрида ўтказиладиган "Ўзбекистоннинг маданий мероси – янги Ренессанс пойдевори” анъанавий маданий мерос ҳафталиги доирасида "Фариданинг икки минг қўшиғи” фильми премьераси бўлиб ўтади.
“Ўзбеккино” Миллий агентлиги Ахборот хизмати хабар беришича, ҳафталикнинг илк куни Ёшлар ижод саройида Халқаро конгресс ташкил этилади. 17 декабрь куни, яъни Конгресснинг 3 куни Ўзбекистон миллий кинематографиясига бағишланади. Айнан шу куни “Ўзбеккино” МА буюртмасига биноан суратга олинган режиссёр Ёлқин Тўйчиевнинг “Фариданинг икки минг қўшиғи” бадиий фильми намойиш этилади.
Эслатиб ўтамиз, мазкур фильм Ўзбекистон Оскар қўмитаси томонидан Оскар-2020 мукофотига номзод этиб кўрсатилган.
Фильм шунингдек, “Москва премьераси” халқаро фестивалида Гран-при мукофотини қўлга киритди. "Олтин глобус" совринининг "Энг яхши хорижий фильм" номинациясига даъвогарлар рўйхатидан жой олди.
Фильмда ўтган асрнинг бошларида Туркистонда юз берган сиёсий воқеаларнинг шу юрт аҳолисига кўрсатган таъсири бир оила мисолида очиб берилади.
Сценарий муаллифи ва режиссёр Ёлқин Тўйчиев, постановкачи оператор Баҳодир Йўлдошев, постановкачи рассом Бектош Ражабов, фильм директори Шавкат Ризаев.
Ролларда Баҳром Матчонов, Юлдуз Ражабова, Элмира Раҳимжонова, Маржона Ўлжаева, Санобар Ҳақназарова, Нодира Хожиқулиева ва бошқалар.
Ҳафталик Тошкент шаҳридаги Ёшлар ижод саройида ўтказилади.
