Валдис Пельш, Джаник Файзиев, Фарҳод Маҳмудов, Эльёр Ишмухамедов ва Александр Кесселлар "Ўзбеккино" билан ҳамкорликдаги фильмлар лойиҳаларини тақдим этишади. Бу ҳақда “Ўзбеккино” Миллий агентлиги Ахборот хизмати маълум қилди
Тошкент шаҳрида «Ўзбекистоннинг маданий мероси – янги Ренессанс пойдевори” анъанавий маданий мерос ҳафталиги доирасида, 17 декабрь куни ўзбекистонлик машҳур режиссёр Жаник Файзиев томонидан “Ўзбеккино” миллий агентлиги буюртмасига биноан суратга олиниши режалаштирилаётган “Буюк ипак йўли” фильминининг тақдимоти бўлиб ўтади.
Россиялик таниқли телебошловчи ва документалист Валдис Пельш ҳам агентлик билан ҳамкорликда ҳужжатли фильм суратга олиши режалаштирилган. Фильм футуристик жанрда бўлиши кутилмоқда. Ўзбекистон маданий мероси ҳафталигининг миллий кинематографияга бағишланган учинчи кунида ушбу фильмнинг ҳам тақдимоти бўлиб ўтиши режалаштирилган.
Бундан ташқари, Россияда ижод қилиб келаётган ўзбекистонлик таниқли актёр Фарҳод Маҳмудов ҳам "Ўзбеккино" МА билан ҳамкорликда "Пари совғаси" деб номланган фильм суратга олади. Ушбу фильм 6 ёшдан катта бўлган болалар аудиториясига мўлжалланган бўлиб, эртак жанридаги картина ҳисобланади. Тасвирга олиш ишлари Бухоро, Самарқанд ва Хивада бўлиб ўтиши режалаштирилган. Ушбу фильм "ВЕГА" кинокомпанияси ва "Ўзбеккино" МАнинг ҳамкорликдаги маҳсулоти ҳисобланади.
Ҳафталик доирасида шунингдек, "Ал‐Бухорий" фильми лойиҳасининг тақдимоти ўтказилиши режалаштирилган. Фильм сценарий муаллифи Одельша Агишев, режиссёр Элёр Ишмуҳаммедов. Фильм буюк бобокалонимиз Имом аль-Бухорий ҳақида бўлиб, ушбу кун лойиҳа ижодкорлари томонидан фильмнинг қисқача мазмуни маълум қилиниб, тақдимоти бўлиб ўтади.
Шу билан бирга «Спутник Восток» кинокомпанияси Бош директори Александр Кессель томонидан “Солнце на вкус» фильми тақдимоти ўтказилади. "Солнце на вкус" (“Қуёш лаззати”) фильми оила даврасида томоша қилиш учун мўлжалланган бўлиб, саргузашт-фантазия жанрида суратга олинади. Фильмни 2021 йилнинг учинчи чорагида тақдим этиш режалаштирилган. Жорий йил октябрь ойида россиялик киноижодкорлар юртимизга ташриф буюриб, суратга олиш жойлари билан танишиб кетишган эди.
