Ҳуқуқ тартибот идоралари томонидан Тошкентда ўтказилган тезкор тадбирлар давомида уч нафар фуқаро ўз яшаш манзилларида ҳужралар ташкил этиб, ёш болаларга диний сабоқ берганлиги аниқланди. Бу ҳақда "Севимли" телеканалининг "Замон" дастурида маълум қилинди.
Ҳужраларда ёғоч калтак, пичоқ, пневматик қуроллар топилган. Уй эгаларининг қўл телефонларида Абдували Мирзаев, Содиқ Самарқандий ва бошқа диний экстремистик оқимлар ва террористик ташкилотлар ғоявий раҳнамоларининг ҳижрат ва жиҳодга чорловчи аудио ва видео материаллари борлиги аниқланди.
Ҳужраларнинг бирида 17 нафар, иккинчисида 11 нафар учинчисида эса 4 нафар вояга етмаган бола диний сабоқ олиб келган. Афсуски, ноқонуний ўқитиш вақтида болалар калтакланиб, мунтазам равишда оч қолдириш орқали жазоланган.
Болаларнинг айтишича, уларнинг танасини орқа ва сон қисмларига чанг юткичнинг шнурини икки қават қилган ҳолатда 15-17 даррадан уришган.
Айримлари калтак таъсиридан хушларини йўқотишган.
Ҳозирда ушбу ноқонуний фаолиятни ташкил этган шахсларга нисбатан қонуний чора кўриш масаласи кўриб чиқилмоқда.
