2021 йилда Халқ таълими вазири сифатида мактабларнинг аҳволини билдирмасдан ўрганиш режангизда борми?
Халқаро пресс-клубнинг Ўзбекистон Республикаси Президентининг Олий Мажлисга йўллаган Мурожаатномасига бағишланган сессиясида берилган ушбу саволга Халқ таълими вазири Шерзод Шерматов қуйидагича жавоб берди:
- Таҳлил қилганимизда республикада 10 мингта мактаб бўлса, 200 минг маротаба текширилган экан. Биз бу йил дастлаб қизил рўйхатга киритилган мактабларга боришни мақсад қилдик. Агар ушбу мактабларнинг моддий-техник аҳволи ёмон бўлса, вазирлик томонидан ҳокимликлар билан ҳамкорликда уларга ёрдам берилади. Жамоа яхши бўлмаса, директорнинг ушбу лавозимга лойиқлиги масаласи кўриб чиқилади. Агар ўқитувчиларнинг малакаси етарли бўлмаса, Президентимизнинг Мурожаатномасида белгилаб берилганидек, яшил рўйхатдаги, яъни яхши мактаблардаги малакали ўқитувчилар 50 ёки 100 фоизлик устамалар билан жалб қилинади.
Мақсадимиз натижаси яхши бўлмаган мактабларга кўпроқ эътибор қаратиш. Бундан ташқари олдимизга исталган пайтда ишга келаётганда мактабларга кириб, ҳолатини кўриб келиш вазифасини ҳам қўйганмиз, деди вазир.
