Юртимиз бўйлаб "Ўзбек миллий кино санъати ҳафталиги" давом этмоқда. Шов-шувга бой киноҳафталикнинг бешинчи куни ҳам мазмунли бўлиши кутилмоқда. Куннинг биринчи қисми “Ёшлар ижодий-тажриба студияси” ДУК томонидан ёшлар учун ташкил этилган кастинг ва фотосессияларга бағишланади. Шунингдек, юртимиз бўйлаб “Янги Ўзбекистон ва Миллий кинематография” Республика кино ҳафталиги мажмуавий тадбирлари давом этади.
Куннинг иккинчи қисмида эса “ДЕБЮТ” Ёш кинематографлар фестивали ўтказилади. Унда ёш киноижодкорлар учун "қизил йўлакча" ташкил этилиши белгиланган. Бундан ташқари, “Менинг дунём” мавзусида 9 та, “Мен сени севаман, Ўзбекистон” мавзусида ҳам 9 та қисқа метражли фильмлар намойиши, кун давомида фестиваль ғолибларини тақдирлаш маросими бўлиб ўтади.
Маросим давомида ўзбек шоу-бизнесининг таниқли вакиллари иштирокида шоу-концерт ташкил этилади. Кечки дастурда эса “Дебют” фестивалининг тантанали ёпилиш маросими бўлиб ўтиши режалаштирилган.
