Россияда канализация қудуғида топилган 33 ёшли Ўзбекистон Республикасида туғилган фуқаронинг жасади бўйича Жиноят кодексининг 105-моддаси (қотиллик) билан жиноий иш қўзғатилди. Бу ҳақда Россиянинг Липецк вилояти тергов қўмитаси хабар қилди.
Маълумотларга кўра, 2021 йил 19 январь куни Добринский тумани Студенка қишлоғида янги қурилган уй эгалари канализация қудуғида полиэтилен пакетга ўралган 33 ёшли эркакнинг жасадини топиб, ҳуқуқни муҳофаза қилиш идораларига хабар беришган. Тергов-тезкор гуруҳ зудлик билан воқеа жойига етиб борган. Текширувда жабрланувчининг бўйни ва бошидан кесилган яралар топилган.
Ҳозирги вақтда жиноятнинг барча ҳолатларини, шунингдек, мигрантни ўлдиришда иштирок этган шахсни аниқлаш мақсадида комплекс тергов ҳаракатлари ва суд экспертизаси ўтказилмоқда. Уй эгалари сўроқ қилинмоқда, қурбоннинг қурилиши тугаган уйда ким билан иш олиб боргани унинг танишлари доираси ишлаб чиқилмоқда. Жиноят иши бўйича тергов давом этмоқда, дейилади хабарда.
