Бугунги кунда Сирдарё вилояти ИИБ 40-сон Манзил-колониясида ҳам жазо муддатини ўтаётган маҳкумларни иш ва ёток жой билан тўлиқ таъминлаш ҳамда касб-ҳунарга ўргатиш йўлида самарали ишлар кўлами кенгаймоқда, дея хабар бермоқда вилоят ҳокимлиги Ахборот хизмати.
Хусусан, колония ҳузурида «Зиё нур агро саноат» давлат унитар корхонаси ташкил этилиб, маҳкумларнинг билим ва салоҳиятларидан самарали фойдаланиш мақсадида қуёнчилик, паррандачилик фермаси, боғдорчилик, майда шохли моллар хамда зотли отларни боқиш ва қурилиш-таъмирлаш ишлари йўналишларида касб-ҳунарга ўргатилмокда.
-Мен бу ерда ўз жазо муддатимни ўташ давомида «Товуқчилик» фермасида ишлаб, унинг сир-синоатларини ўрганиб олдим. Жазо муддатимнинг дастлабки кисмини ўтаган 2-сон ЖИЭК кутубхонасида паррандачиликка оид адабиётларни, ўкув қўлланмаларини ўқиган эдим. Ўқиб ўрганганларим бу ерда менга жуда қўл келди. Ушбу колонияга келганимдан сўнг билимларимга таяниб, колония бошлиғи ҳамда ДУК директорига товуқчилик фермаси очиш таклифини билдирдим. Улар маҳкум бўлсамда менинг таклифимни маъқуллаб, ҳамма шарт-шароитларни яратиб беришди. Бу табиийки, мени руҳлантириб юборди. Шу асосда колонияда 10 минг дона товуқ боқишга мўлжалланган ферма қуриб битказилиб, тухум олиш учун боқиладиган наслдор жўжалар келтирилди. Бугунги кунда сифатли тухум махсулотларини етиштириб, республикамиз худудидаги жазони ижро этиш колонияларини хам таъминлаб келмокдамиз. Озодликка чиқсам, оилам билан биргаликда шу касбни давом эттириб, юрт равнақига ўзимнинг оз бўлса-да ҳиссамни қўшаман деб ният қилганман. Колонияда ўзимга мутлақо ёт бўлган янги касбни эгаллаб, юртимиз бозорларига, шунингдек, чет элга сотиладиган экспортбоп парранда гўшти ва тухум маҳсулотларини етказиб берувчи етук мутахассис бўлиб етишиш умидидаман, - дейди маҳкум Мухтор Раҳимов.
Маҳкумлардан яна бири Серик Хамураев ушбу колонияга келган вақтидан бошлаб бугунги кунга қадар ўтказган вақтида қуёнчилик соҳасини ўрганди.
-Мен ушбу колонияга келганимдан сўнг колония маъмурияти томонидан ферма ҳудудида жойлашган қуёнхонада ишлашга жалб қилиндим. Вазифам бу ерда боқилаётган 200 та Янги Зелландия, Калифорния, Великан ва Ангор турдаги қуёнларни парваришлаш эди. Янги ишимга катта қизиқиш, ўзгача ғайрат билан киришганим қуёнчилик соҳасини тез ўрганишимда қўл келди. Аввало, колонияда жойлашган кутубхонадан қуёнлар ҳақидаги қўлланмалар, китоблар билан танишиб чиқдим. Яхши боқилса, урғочиси тўрт ойда 4-5 килограмм, эркаги 8 килограммгача тош босади. Бундан даромадни чамалаш қийин эмас. 1 килограмм қуён гўшти бозорда 30 минг атрофида туради. Масалан, 100 бош эркаги ўртача 800 килограмм гўшт қилади. Бу ўргача 24 миллион сўм, дегани. Эндиликда уларнинг терисини ошлаш, қайта ишлашни ўзлаштиряпман. Очиғи, ҳозирча фойда ҳақида гапиришга эрта. Шу пайтгача тушган даромадни фаолиятни ривожлантиришга, такомиллаштиришга йуналтиряпмиз. Энг муҳими бу ердан ўрганганларимдан фойдаланиб, келажакда ўз қуёнчилик фермамни очишни мақсад қилдим.
-Колониямизда товуқчилик, қуёнчиликдан ташқари чилангарлик касби бўйича ҳам ишлар олиб борилади. Устоз-шогирд анъанасига мувофиқ мен ўзимдаги билимларимни, шогирдларимга ҳам бериб келмоқдаман. Аввало, шогирдларимга йўриқнома ва техника хавфсизлиги қоидалари ҳақида тушунтираман. Чунки чилангарлик ишида бу нарсалар жуда мухим. Бу ер жазони ижро этиш колонияси бўлганлиги учун, назарий билимдан кўра амалий машғулотларни кўпроқ ўтиш керак бўлади. Бундан асосий мақсад ёшларни бандлигини таъминлаш, келгусида озодликка чиқандан кейин қайта жиноят қилмаслиги ва колонияда олган билим ва кўникмаларини жамиятда қўллаб, ҳам оиласи, ҳам юртимиз учун етук инсон бўлишидир, - деди колониядаги маҳкумлардан яна бири Хайридин Халиқов.
Хулоса ўрнида шуни таъкидлаш жоизки, мазкур колонияда ўтаётган ҳар бир кун маҳкумларга нафақат хатолардан сабоқ чиқаришни балки касб-ҳунарни ҳам ўргатаётган экан. Зеро, ҳунари бор, ўз севган машғулоти билан банд инсондан ҳеч қачон жиноятчи чиқмайди. Фаолиятдан мақсад ҳам шу аслида.
