Олий Мажлис Қонунчилик палатаси депутати Расул Кушербаев сўнгги кунларда аҳолидан ўзига келаётган шикоятларнинг аксарияти табиий газ учун ўрнатилаётган электрон ҳисоблагичлардан норозилик билан боғлиқ эканлигини айтмоқда.
" – Асосий норозилик янги ҳисоблагичлар ўрнатилиши билан аҳолига илгариги меъёрдан бир неча баравар кўп пул ҳисоблаётгани ва газ огоҳантиришсиз ўчириб қўйилаётгани билан боғлиқ. Шикоятчиларнинг тўлов қобилияти шундоғам паст.
Қизиғи янги ҳисоблагичлар Ўзстандарт текширувларидан ўтган. Аҳоли хонадонларида фойдаланувда бўлган эски ҳисоблагичлар ҳам ҳудди шу Ўзстандарт текширувидан ўтиб ўрнатилганди. Бироқ нега икки хил ҳисоблаяпти?
Демак, шу вақтга қадар кимдир кимларнидир алдаб, фойда қилиб келган ва энди жойига тушаяпти ёки энди алдаб жойида бўлган тизимни бузаяпти.
Бу масалада тез кунларда Ўзстандарт ва Истеъмолчилар ҳуқуқларини ҳимоя қилиш агентлиги мутахассислари иштирокида ошкора ўрганиш ўтказсак мақсадга мувофиқ бўларди", – дейди халқ вакили.
