Ўзбекистоннинг Истанбул шаҳридаги Бош консулхонаси ходимлари ва Истанбул аэропорти божхона хизмати вакиллари иштирокида тезкор ҳамкорликни йўлга қўйиш, Туркияга келган ватандошларга консуллик ва ҳуқуқий ёрдам кўрсатиш масалалари муҳокамасига бағишланган учрашув ўтказилди, деб хабар бермоқда «Дунё» АА.
Музокараларда Ўзбекистон фуқароларининг Туркияга кириб келишида юзага келаётган баъзи масалалар юзасидан фикр алмашилди, хусусан, зарур ҳолларда шошилинч алоқага чиқиш усуллари, консул, адвокат, таржимон ва бошқа мутахассисларни жалб қилишни самарали ва тезкор ҳал қилиш муҳокама қилинди.
Божхона ходимлари пандемия даврида парвозлар сонининг камайиши сабабли ҳуқуқбузарликлар сони ҳам сезиларли даражада пасайганини таъкидлади. Бироқ Ўзбекистон фуқаролари орасида чой, қуритилган мевалар ва бошқа маҳсулотларни белгиланган меъёрдан ортиқ олиб киришга уринишлар ҳанузгача аниқланмоқда. Шу муносабат билан Туркия расмий вакиллари тақиқланган маҳсулотлар билан чегарани кесиб ўтган шахсларга нисбатан мамлакат Жиноят кодексининг тегишли моддалари бўйича жиноий иш қўзғатилаётганини қайд этди. Хусусан, Туркия қонунчилигига кўра, ушбу турдаги ҳуқуқбузарликлар учун олти йилгача озодликдан маҳрум қилиш, маъмурий жарима жазолари назарда тутилган. Бундан ташқари, суд қарори чиққунга қадар мамлакат ташқарисига чиқариб юборилган фуқаролар, агар суд уларни айбдор деб топса, қидирувга берилиб, улар Туркия чегарасини яна кесиб ўтмоқчи бўлганида ҳибсга олинади.
Фарғона-Истанбул ва Урганч-Истанбул йўналишларидаги янги рейсларнинг очилиши Ўзбекистондан йўловчилар оқимининг ошишига хизмат қилади. Божхоначилар ушбу омилларни ҳисобга олиб ватандошларимиз Туркия қонунларига қатъий риоя қилиши муҳимлигини таъкидлади. Шунингдек, тамаки маҳсулотлари ва спиртли ичимликларни фақат 18 ёшга тўлганлар импорт қилиши мумкинлигига алоҳида эътибор қаратилди.
Учрашувда, шунингдек, Ўзбекистон фуқаролари Туркияга киришдан олдин зарур маълумотларни «Yolcular İçin Gümrük Rehberi» иловасидан олиши мумкинлиги айтиб ўтилди.
Қуйида Туркия қонунчилигига кўра маҳсулотларни божхона тўловисиз олиб кириш қоидаларини белгилайдиган баъзи нормалар тақдим этилмоқда:
Спиртли ичимликлар:
1. Таркибида 22% дан ортиқ алкоголь бўлган спиртли ва алкоголли ичимликлар - 1 литр.
2. Таркибида 22% дан ортиқ алкоголь бўлган алкоголь ва алкоголли ичимликлар - 2 литр.
Тамаки маҳсулотлари:
1. Сигаретлар - 600 дона
2. Сигариллос (ҳар бир сигаронинг вазни 3 граммдан ошмаслиги керак) - 100 дона.
3. Сигарлар - 50 дона.
4. Тамаки (200 варақ сигарета қоғози билан бирга) - 250 гр.
Дорилар:
1. Шахсий даволаниш учун фойдаланиладиган (тиббий маълумотнома ва рецепт билан биргаликда);
2. Шахсий фойдаланиш учун тиббий буюмлар.
Косметика маҳсулотлари:
1. Максимал 600 мл. - атир, одеколон, лаванта, парфюмерия ёки лосьон, 5 та терини парвариш қилиш воситаси, бўяниш воситалари.
Озиқ-овқат маҳсулотлари:
1. Чой - 1 кг.
2. Тайёр эрийдиган кофе - 1 кг.
3. Қаҳва - 1 кг.
4. Шоколад - 1 кг.
5. Шакардан тайёрланган озиқ-овқат маҳсулотлари - 1 кг.
6. Асал - 2 кг.
7. Янги сабзавот ва мевалар - 3 кг.
8. Ширинликлар - 1 кг.
Уй ҳайвонлари:
Улар йўловчида бўлиши шарти билан: жами иккита уй ҳайвони (мушук, қуш, ит) ёки 10 та аквариум балиғи (ветеринария гувоҳномаси, ўтиш гувоҳномаси, эмлаш тўғрисидаги гувоҳнома, ҳайвоннинг паспорти ёки ҳужжатлар мавжуд бўлганда, ветеринария назоратидан ўтиш гувоҳномалари).
Электрон қурилмалар:
1. Мобиль қурилмалар - 1 дона
2. Камера - 1 дона
3. GPS навигатори - 1 дона
4. Компьютер ва ноутбук - 1 дона
5. Радио қабул қилгич - 1 дона
6. Овоз ва видео ёзувлар қурилмаси - 1 дона
7. Ўйин приставкаси - 1 дона
8. CD, DVD - 10 дона.
9. Телевизор (диагонали 55 дюйм) - 1 дона.
Заргарлик буюмлари:
1. Қимматбаҳо металлар ва тошлардан шахсий фойдаланиш учун тайёрланган, тижорат мақсадлари мавжуд бўлмаган, қиймати 15 000 АҚШ доллардан ошмайдиган буюмлар;
2. Заргарлик буюмларининг мамлакатдан 15 000 доллардан ошиқ миқдордаги экспорти ушбу буюмлар мамлакатга киришда декларацияга ёки уларнинг Туркияда сотиб олинганлигини тасдиқлашга боғлиқ.
Тақиқланган маҳсулотлар:
Гиёҳванд моддалар ва уларнинг ҳосилалари;
Қишлоқ хўжалиги мақсадларида ишлатиладиган тупроқнинг барча турлари, барглари, поялари, сомонлари, ўтлари, табиий ўғитлари;
Ўйин автоматлари ва қурилмалари;
Спиртли ичимликлар лойиҳаси;
Кимёвий моддалар;
Гўшт ва гўшт маҳсулотлари.
