Сўнгги кунларда муҳокамалар майдонининг қизғин бахсларидан бирига айланган “Мендирман Жалолиддин” тарихий сериали кўпчиликни тарих саҳифалари, тарих адабиётларини қайта кўриб чиқишга ундаётгани бор гап. Бадиий тўқималарга бой бўлган мазкур фильмни кўриш орқали томошабин унинг тарихий ҳақиқатларга қанчалик мос келишини текшириб кўради. Ўзи учун аслида Жалолиддиннинг ким эканлигини кашф этади. Аслида ҳар икки ҳолатда ҳам Жалолиддин Мангуберди шахси улуғланган қиёфада акс этади. Унга тақлид қилувчилар, уни ўзига тимсол сифатида кўрувчилар сони кўпаяди. Маданият вазири Озодбек Назарбеков айни фикрларни илгари сурган “Мендирман Жалолиддин” киноижодкорлари матбуот анжуманида бош роль ижрочиси Эмре Кивилжим, продюсер Меҳмет Боздағ, сценарий муаллифларидан бири Бобохон Шарифлар ҳам сўзга чиқишди.
ЭМРЕНИНГ АСЛ МУТАХАССИСЛИГИ – КИМЁ МУҲАНДИСИ
Жалолиддин Мангуберди образини гавдалантирган Эмре Кивилжимнинг айтишича, у 1991 йили Туркиянинг Малатья шаҳрида дунёга келган. Асли мутахассислиги кимё муҳандиси. Жалолиддин эса тарихий фильмлардаги иккинчи роли. “Энг катта орзуим эса Амир Темур ролини ижро этиш. Бунинг имкони бўладими-йўқ, ҳозирча билмайман”, - дейди у бизга берган интервьюсида.
СЕРИАЛ ПРОДЮСЕРИНИНГ “МЕНДИРМАН ЖАЛОЛИДДИН”ДАН ОЛДИН ЎЗБЕК ТАРИХИГА ҚИЗИҚИШИ БЎЛГАН
Меҳмет БОЗДАҒ, “Bozdag’ film” асосчиси, “Мендирман Жалолиддин” сериали продюсери:
– Ўзбек адиби Одил Ёқубовнинг “Улуғбек хазинаси”, “Кўҳна дунё” асарларини ўқиганимда Ўзбекистон тарихи ҳақида кино яратиш ғояси туғилган эди. Шу боис Жалолиддин Мангуберди ҳақида сериал олиш таклифини катта мамнуният ва қизиқиш билан қабул қилдим. Зеро, бу бизнинг муштарак тарихимиз, ота юртимиз қаҳрамонлари ҳақидаги фильмдир. Унга тайёрланиш жараёнида 9 ой Самарқанд, Бухоро, Тошкент, Хива каби тарихий шаҳарларда бўлиб, 1200 йил олдинги манбаларни ўргандик, тарихий воқеалар, ўша пайтдагиларнинг яшашш тарзини кўз ўнгимда жонлантиришга ҳаракат қилдим. Ҳамкорликда олинган ушбу сериалдан кейин бизга яна таклифлар туша бошлади. Келажакда Амир Темур, Ибн Сино, Улуғбек каби буюк инсонлар ҳақида ҳам фильм олиш режамиз бор. Ўзбек тарихини дунёга танитиш ниятим бор, ота-боболаримиз биздан рози бўлсин.
“МЕНДИРМАН ЖАЛОЛИДДИН” БАДИИЙ ФИЛЬМ, ҲУЖЖАТЛИ ЭМАС!”
Бобохон ШАРИФ, ёзувчи, сценарий муаллифларидан бири:
– Унда бадиий тўқима меъёрдан ошиб кетгани борасида эътироз билдирилмоқда. Яна такрорлайман, “Мендирман Жалолиддин” жанрига кўра бадиий фильм, ҳужжатли фильм эмас! Лекин шунга қарамай, тарихий воқеликни тўлақонли ифодалашга жиддий эътибор қаратилмоқда. Образли қилиб айтадиган бўлсак, эндигина уруғ экдик. У ҳали ниҳолга айланиб япроқ чиқариши, ғунчалаши керак. Сўнгра мева тугади. Томошабинларимиз сабр билан сериалнинг қолган қисмларини кўрсинлар. Улар кутган тарихий воқеалар ҳам навбати билан тасвирланади.
Сардорбек Раҳмонқулов
Мавзуга оид:
