Бугун Андижон шаҳрида реконструкция қилинган “Бобур арена” спорт объектида янги мавсумга старт берилди. Мавсум Андижон ва Сурхон футбол клублари ўртасидаги ўйин билан бошланди. Ўйин хозирча давом этяпти. Биз эса ўйин якунигача бошқа мавзуда хабар қилишга қарор қилдик.
СТАДИОНДАН АРЕНАГА АЙЛАНГАН МАЖМУА
Андижон шаҳридаги “Соғлом авлод ўйингоҳи” Ўзбекистон Республикаси Президентининг 2020 йил 30 октябрдаги 6099-сон Фармони ҳамда Андижон вилояти ҳокимлигининг 2020 йил 6 ноябрдаги 275-к сонли қарорига асосан “Бобур арена” ўйингоҳи деб номланган. Ушбу объект 2003 йилда қурилган бўлиб, 19 минг 800 нафар томошабин ўринга эга замонавий спорт мажмуаси хисобланади. Объектда бир вақтнинг ўзида спортнинг футбол ҳамда енгил атлетика турлари бўйича 150 нафардан зиёд спортчилар шуғулланиш имкониятига эга. Умумий қиймати 5 млрд. сўмликдан зиёд бўлган реконструкция ишлари натижасида объектда замонавий фасад ишлари, майдон чимини янгилаш, барча ёрдамчи хоналарни реконструкция қилиш, ўйингоҳ ташқи қисмида зарурий инфратузилма объектлари (манзарали фавворалар, фуқаролар учун кўнгилочар масканлар, ресторан, кафе, фото студия, мини банк, спорт жиҳозлари ҳамда либослар дўконлари каби) барпо этилмоқда.
МУСТАНГ ВА СПАРКГА КИМЛАР, ҚАНДАЙ ЭГАЛИК ҚИЛИШИ МУМКИН?
Андижон вилояти ҳокимлиги котибияти мудири Элёрбек Холмирзаевнинг айтишича, Андижон футбол клуби Ўзбекистонда ўтказилаётган футбол чемпионатида кучли учликка кирса, уйинчиларнинг ҳар бирига, заҳирадаги ўйинчисигача Форд Мустанг автомобили совға қилинади. Шунингдек, Андижонда бўлиб ўтадиган ҳар бир ўйинда мухлислар учун лотерея ўйналади ва лотерея ғолиби Спарк машинасини миниб чиқиб кетади.
Сардорбек Раҳмонқулов
