Воқеа 6-март куни – аёллар байрами арафасида содир бўлди. Аёлнинг айтишича, 1993 йилда турмуш қуришган эр ва хотин йиллар давомида ўзаро келишмовчиликлар асосида мунтазам жанжаллашиб келишган. Улар Қарши туманидаги«Ширкент» маҳалласида яшашади. Эркак фарзандлари вояга етиб, қудали-андали бўлганида ҳам хотинини доппослашда давом этади.
Таъкидланишича, ўша кунги эр-хотин мажорасига ҳам арзимаган ҳолат сабаб бўлган. Ғазаб отига минган эркак оиласига ўлим билан таҳдид қилади. Бундан қўрқувга тушган аёл маҳалла йиғинига ва инспекторга хабар беради. Уларни кўрган эркак жазавага тушиб маиший газ балонини потлатиб юборишини айтади. Инспектор аёл ва унинг қизини хавфсиз жойга олиб ўтиб, эркакни тинчлантириш учун хонадон эшигига яқинлашган пайтида у газ тўлиб турган хонага гугурт чақиб юборади. Натижада уйнинг бир қисми портлаб кетади. Уни тинчлантирмоқчи бўлган инспектор ва маҳалла котиби эса жабрланиб, шифохонага тушади.
«Хотиним у деди, мен бу дедим. Жаҳлим чиқиб турган эди. Ўзимни кўрсатмоқчи бўлдимми, билмайман. Қилган ишимдан пушаймонман», — дейди эркак.
Ҳозирда туман прокуратураси томонидан суриштирув ишлари олиб борилмоқда.
