Бу ҳақда "darakchi.uz"га Инновацион ривожланиш вазирлиги Матбуот хизмати хабар берди.
Хитойнинг Anhui Zhifei Longcom Biopharmaceutical Co., ltd компанияси раҳбари Ли Вансзюннинг маълум қилишича, тез кунларда Ўзбекистонга яна 3.5 млн. доза юборилади. Шу билан бирга у Хитойда 1 млн киши мазкур ZF-UZ-VAC2001 вакцинаси билан эмланганини, вакцинация натижасида жиддий ножўя таъсирлар қайд этилмаганини маълум қилган.
У ўз навбатида Ўзбекистонда бошланган вакцинация жараёнига малакали мутахассисларни жалб қилган ҳолда, катта эътибор билан жараённи амалга ошириши лозимлигига эътибор қаратди. Вакцинацияни тўғри ташкил этиш эмлаш натижасида кузатилиши мумкин бўлган аллергик реакцияларни ўз вақтида бартараф этиш имконини беради.
Ҳозирга қадар Ўзбекистонда ҳам мазкур вакцина синовларида 7 минг нафар кўнгилли иштирок этди. Мазкур тадқиқот вакцинанинг юқори даражада хавфсиз эканини намоён этди.
Шунингдек, Хитой Фанлар академияси ҳамда дунёнинг 40 га яқин халқаро илмий ва олий таълим муассасалари томонидан ташкил этилган Халқаро илмий ташкилотлар альянси – Alliance of International Science Organizations (ANSO) раҳбари Jinghua Cao Ўзбекистон биринчилардан мазкур вакцина синовларида муваффақиятга эришганини қайд этди. У шунингдек, Zhifei Longcom компанияси Ўзбекистоннинг вакцинага бўлган ички талабларини қондириш йўлида барча имкониятларни ишга солишига ишонч билдирди, дейилади вазирлик тақдим этган маълумотда.
