2 апрель куни Ўзбекистон Республикаси Олий Мажлиси Сенати Раиси Танзила Нарбаева бошчилигидаги Ишчи гуруҳ ҳудудларни ижтимоий-иқтисодий ривожлантириш, аҳоли турмуш фаровонлигини ошириш, тадбиркорлик фаолиятини қўллаб-қувватлаш борасида олиб борилаётган ишларни ўрганиш ва аҳоли билан бевосита мулоқот қилиш мақсадида Тошкент вилоятининг Янгийўл ва Қуйи Чирчиқ туманларида бўлди. Бу ҳақда Ўзбекистон Республикаси Олий Мажлиси Сенатининг Ахборот хизмати маълум қилди.
Ташриф давомида мазкур ҳудудларда аҳоли турмуш фаровонлигини яхшилаш йўлида олиб борилаётган ишлар билан танишиш, ишлаб чиқариш, қишлоқ хўжалиги маҳсулотлари етиштириш, тадбиркорлик субъектлари фаолиятини йўлга қўйиш, хотин-қизларни қўллаб-қувватлашдаги саъй-ҳаракатларга эътибор қаратилди.
Бугунги кунда Янгийўл туманида жами 69 та маҳалла мавжуд бўлиб, шундан 6 таси қизил, 45 таси сариқ, 18 таси яшил ҳудуд этиб белгиланган. Қизил ҳудуддаги “Жамбул”, “Пахта”, “Эпкенди” маҳаллаларида тизимли муаммолар ечим топмоқда.
Ишчи гуруҳи дастлаб Янгийўл тумани “Юксалиш” МФЙда “Аёллар дафтари”га киритилган хотин-қизларни иш билан таъминлаш борасида амалга оширилган ишларни кўздан кечириш мақсадида “Анора Ғилоф Барака” ОКга қарашли тикувчилик корхонасида бўлди.
Абдукарим Абдурахимов 2001 йилда якка тадбиркор сифатида ўз ишини бошлаган. 2010 йида эса оилавий корхонага айлантирган. Автомобиллар учун ғилоф тикиладиган ушбу корхонада ҳозирда 70 нафарга яқин ишчилар фаолият юритмоқда. Аҳамиятлиси, уларнинг аксарияти ушбу маҳаллада истиқомат қилувчи, “Аёллар дафтари”га киритилган хотин-қизлардир. Ишлаб чиқарилган маҳсулотлар ҳозирда ички бозорга сотувга чиқарилмоқда. Яқин кунларда чет мамлакатлар, қўшни давлатларга экспорт қилиниши режалаштирилган.
Шу ернинг ўзида маҳалладаги хотин-қизлар билан дилдан суҳбатлашилди, уларнинг муаммолари эшитилди.
Хусусан, уй-жой билан таъминланиш, соғлиғини тиклашда ёрдам, тадбиркорлик фаолиятини йўлга қўйишда имтиёзли кредит бериш, ишга жойлашиш каби қатор масалаларда кўмак сўралди. Уларнинг аксариятига шу ернинг ўзида ечим топилди. Тегишли мутасаддиларга кўрсатмалар берилиб, ижроси назоратга олинди.
Навбатдаги манзил – “Пахта” МФЙ. Ишчи гуруҳ аъзолари ушбу ҳудудда тадбиркорлик субъекти томонидан ташкил этилган контейнерларда “Аёллар дафтари”га киритилган хотин-қизларнинг тикувчиликка ўқитиш маркази фаолиятига эътибор қаратди. Қолаверса, маҳалла аҳли, хотин-қизлар билан учрашиб, мурожаатларини ўрганди.
Шундан сўнг, “Нов” маҳалласида яшовчи ҳунарманд Беҳзод Мадраимов хонадонида ҳунармандчилик ишлари билан танишилди. Эътиборлиси, ушбу тадбиркор 18 нафар аёлни иш билан таъминлаган. Бундан ташқари, “устоз-шогирд” анъанаси асосида 19 нафар шогирд тайёрламоқда. Асосан қўл меҳнати бўлган ушбу тадбиркорнинг ишлаб чиқарган маҳсулотлари Саудия Арабистонида харидорбоп.
Сенат Раиси тадбиркор билан суҳбатлашар экан, унинг таклифларига қулоқ тутди. Ишбилармон Б.Мадраимов иш фаолиятини янада кенгайтириш мақсадида жой ажратилишида ёрдам сўради. Ушбу масала тез орада ҳал этиладиган бўлди.
Сўнгра “Жамбул” МФЙда аҳоли, шу жумладан, “Аёллар дафтари”га киритилган хотин-қизлар билан мулоқот қилинди. Учрашувда субсидия асосида иссиқхона қуриб бериш, тадбикорлик фаолиятини йўлга қўйиш ва кенгайтиришда жой ажратиш ҳамда имтиёзли кредит олиш, тикув машиналари берилишида ёрдам сўралди. Улар тез орада ижобий ҳал этилади. Боиси, тегишли мутасаддиларга кўрсатмалар берилиб, ижроси назоратга олинди.
“Дархон” МФЙда истиқомат қилувчи К.Каримованинг уч нафар фарзанди бор. Яқинда унга 3 хонали уйнинг бошланғич тўлови тўлаб берилди. Ўғли Жавоҳирбек эса ижодкор, шеър ёзади. Туман ҳокимлигининг амалий кўмагида биринчи китоби чоп этилди. Тез орада “Йиғламанг, она” деб номланган яна бир шеърий тўплами ҳам чоп этилади. Унинг сарф-харажатлари эса ҳокимлик томонидан қопланадиган бўлди. Учрашувда Жавоҳирбекка компьютер совға қилинди.
Қуйи Чирчиқ туманидаги “Алким Текстил” МЧЖ корхонасида 150 нафар хотин-қиз меҳнат қилмоқда. 2019 йилда россиялик ҳамкорлар билан бирга ташкил этилган ушбу қўшма корхонада “Темир дафтар”, “Аёллар дафтари”га киритилган хотин-қизлар ҳам фаолият юритмоқда.
Сенат Раиси бошчилигидаги Ишчи гуруҳи бу жамоанинг ютуқлари билан танишаркан, бежирим кийим-бош тикаётган хотин-қизларнинг ишлаш ва яшаш шароитлари билан қизиқди.
Қолаверса, ишчи ходимларни моддий ва маънавий рағбатлантириш масалаларига эътибор қаратилди. Уларни Касаба уюушмаси томонидан ходимларни республикамизнинг қадимий шаҳарларига саёҳатга юбориш масаласи кўриб чиқиладиган бўлди.
“Ватан” МФЙдаги мулоқотларда эса “Аёллар дафтари”да қайд этилганларнинг ижтимоий ҳимояси, бу жараёндан чиқиб кетиш чора-тадбирлари, оилалардаги турмуш қийинчиликларини енгишда аёлнинг журъати ва жасорати хусусида тўхталиб ўтилди.
Суҳбат жараёнида имконияти чекланган, 18 йилдан буён ижарада яшаётган Ў.Тошхўжаевага тикув машинаси олиб бериладиган бўлди. Унинг гулдай ҳунари бор, аммо дастгоҳ харид қилишга сармояси йўқ эди. Х.Носировани эса 8 йилдан буён жигар церрози қийнайди. Даволаниш учун имконияти чекланган. Унинг ҳам муаммосига ечим топилди.
Сенат Раисининг халқ депутатлари Янгийўл ва Қуйи Чирчиқ туманлари Кенгашлари депуталари билан ўтказган учрашувларида аҳоли ва хотин-қизлар томонидан кўтарилган муаммоларни ҳал этиш, аёлларга ҳар томонлама кўмаклашиш масалалари муҳокама қилинди.
Туманда ташкил этилган “маҳаллабай” ишлаш бўйича штаб фаолияти билан танишилди. Қолаверса, “Аёллар дафтари”га киритилган хотин-қизларга алоҳида ёрдам кўрсатиш, нотурар жойларда истиқомат қилаётган, тиббий ҳимояга муҳтожлар, тадбиркорлик қилиш истагини билдирган, томорқасидан даромад олиш йўл-йўриқларини қидираётган аёлларга кўмак бериш борасидаги саъй-ҳаракатларда депутатларнинг ўрнига эътибор қаратилди. Қолаверса, сектор раҳбарлари, тегишли мутасаддиларнинг ахборотларини эшитиб бориш каби жиҳатларга тўхталиб ўтилди.
Шунингдек, маҳаллий Кенгашлар депутатларининг фикр-мулоҳазалари эшитилди ҳамда зарур тавсиялар берилди.
