12 апрель – Халқаро авиация ва космонавтика куни муносабати билан 1-сонли Мурувват интернат уйи тарбияланувчилари ва 76-сонли умумтаълим мактаби ўқувчилари учун пойтахтимизда жойлашган Планетарийга экскурсия уюштирилди.
У ерда ўқувчи ёшларга 1961 йил 12 апрель куни рус космонавти Юрий Гагарин инсоният тарихида илк марта коинотга парвоз қилганлиги, ушбу сана 1968 йилдан буён Жаҳон авиация ва космонавтика куни сифатида кенг нишонланиб келаётгани ҳамда ҳозирги пайтда ушбу соҳанинг қай даражада тараққий этганлиги бўйича маълумотлар берилди.
Шунингдек, фазогирлар кунига бағишланган давра суҳбати сўнгида коинот ҳақида фильм намойиш этилди.
Планетарий музейи ўқувчиларда катта қизиқиш уйғотиб, болажонларга бир олам таассуротлар бахшида этди. Экскурсия якунида болажонларга Миллий гвардия МТТ базаси ҳарбий хизматчилари томонидан эсдалик совғалари тақдим этилди.
