Масс-медиа фонди Васийлик кенгаши раиси ўринбосари, Ўзбекистон Республикаси Гендер тенглигини таъминлаш бўйича комиссияси аъзоси Саида Мирзиёева ижтимоий тармоқлардаги саҳифалари орқали Ўзбекистон халқини Муборак Рамазон ойи билан табриклади.
"Сизларни кириб келган муборак ой билан чин қалбдан табриклайман. Ўтган Рамазондан буён орадан бир йил ўтиб кетганига одам ишонгиси келмайди. Соатлар дақиқаларга, йиллар ойларга айланган, гўё. Вақт елдек учиб кетяпти. Бу ҳам Қиёматга, амаллар тарозуга қўйиладиган Кунга яқинлашаётганимиздан далолат...
Мен учун бу жуда кўп ишларга улгуришимиз керак, дегани. Кўпроқ хайрли амалларни қилишга, кўпроқ яхши гаплар гапиришга, ёрдамга муҳтожларни қўллашга, ҳимояга муҳтожларнинг ёнида туриб беришга улгуришимиз керак. Бу йўлни ақл-идрок ва тиришқоқлик билан босиб ўтишимизни насиб этсин.
Дўстларим, ойларнинг султонида тутган рўзаларингизга Ўзи енгиллик берсин, ажр-мукофотини зиёда қилсин. Аллоҳ Сизни паноҳида асрасин, дуо-ибодатларингиз қабул бўлсин", - дея ёзган Мирзиёева.
Шунингдек, ушбу табриклар билан бирга у қизи Саодатнинг суратларини ҳам эълон қилган ва "Суратда менинг 10 ёшли қизим Саодат. Менинг жажжи, улкан бахтим... ❤️. Саодатим икки дунё саодатини кўришини истайман..." - деб қўшимча қилади у.
