Россия Федерациясининг Уфа шаҳридаги “ВНЗМ” МЧЖнинг Самара вилоятидаги филиалига март ойида Ўзбекистон фуқаролари вақтинча меҳнат фаолиятини амалга ошириш учун келган эди.
Ташқи меҳнат миграцияси агентлигининг Самара шаҳридаги ваколатхонасига мазкур меҳнат мигрантларидан корхонага тегишли ётоқхонада истиқомат қилаётгани ва улар томонидан берилаётган овқатдан шикоят келиб тушган. Бу ҳақда Агентлик ахборот хизмати хабар бермоқда.
Ваколатхона ходими томонидан муаммо жойига чиқиб ўрганилди. Йўл қўйилган камчиликлар иш берувчига тушунтирилди. Яқин кунларда фуқароларнинг патент ва бошқа ҳужжатлари расмийлаштирилгандан сўнг, уларнинг карталарига маблағ ўтказилиши белгиланди.
Шунингдек, Ташқи меҳнат миграцияси агентлигининг Самара шаҳридаги ваколатхонаси томонидан Самара шаҳри Крижановского кўчасидаги қурилиш объектига Ўзбекистон фуқароларини ишга жалб қилиш бўйича иш берувчилар билан музокаралар олиб борилиб, шароитлари ўрганилган.
