12 апрель куни Россиянинг Санкт-Петербург шаҳрида тарихий фабрика ёниб кетди. Бу ҳақда Фавқулодда вазиятлар вазирлигининг Санкт-Петербургдаги Бош бошқармаси маълумотига таяниб Коммерсант маълум қилди.
Маълум қилинишича, майдони 5 минг квадрат метрдан ортиқ бўлган саноат биносининг икки қавати ёнган. Ёниш майдони 1,5 минг квадрат метрни ташкил қилган.
Қирқ киши ҳодиса жойидан эвакуация қилинган, икки ўт ўчирувчи касалхонага ётқизилган.
Кучли аланга оқибатида шаҳар бўйлаб қора тутун пайдо бўлган.
Фавқулодда вазиятлар вазирлиги ёнғин Нева дарёсининг Октябрская қирғоғидаги "Невская мануфактура" биносида содир бўлганини таъкидлаяпти.
Завод собиқ иттифоқ даврида миллийлаштирилган ва давлат корхонаси сифатида фаолият юритган. Кейинчалик, 1992 йилда хусусийлаштирилган.
Сўнгги йилларда бинонинг айрим қисмлари мато ишлаб чиқариш билан шуғулланган. Яна баъзи жойлари офис майдони сифатида ижарага берилган.
Рисолат МАХСИМОВА тайёрлади
