Кеча, 15 апрель куни Олмалиқ шаҳрида солиқ органи ходимлари сотувчи аёлларнинг буюмларини тортиб олишга уриниб, ерда судрагани акс этган видео барчанинг диққат-эътиборини тортди. Хусусан, Давлат солиқ қўмитаси раиси Шерзод Кудбиев Самарқанд вилоятида хизмат сафарида бўлиб турган жойидан видеомурожаат билан чиқиб, бу иш учун узр сўради ва ушбу ходимларга нисбатан чора кўрилишига ваъда берган эди.
Шундан сўнг, уч нафар солиқ ходими эгаллаб турган лавозимидан озод этилди ва махсус унвонлари бекор қилинди. Бу ҳақда Давлат солиқ қўмитаси бошқарма бошлиғи ўринбосари Музаффар Назаров “Замон”га маълум қилди.
"Солиқ ходиларининг бу ҳаракатлари солиқ тизими қонунчилигига умуман тўғри келмайди. Солиқ тизими фуқароларга нисбатан куч ишлатар тизим эмас, аксинча уларга кўмакчи бўлиши лозим. Куни кеча содир бўлган воқеа юзасидан тезкор хизмат текшируви ўтказилди ва видеода кўринган уч нафар ходим ишдан озод этилди. Шунингдек, Олмалиқ шаҳар давлат солиқ бошқармаси бошлиғи ва яна икки нафар масъул шахсга нисбатан интизомий чора қўлланилди", - деди Музаффар Назаров
Шунингдек, Давлат солиқ қўмитаси Ахборот хизмати хабарига кўра,Тошкент вилояти ДСБ бошлиғига ҳам ҳайфсан берилди.
«Солиқчи-кўмакчи» тамойили асосида шу пайтга қадар ноқонуний фаолият юритган фуқароларга тегишли ҳуқуқий ёрдам кўрсатилиб, фаолияти қонунийлаштирилди. Уларга Олмалиқ шаҳридаги савдо марказидан тегишли жой ажратиб берилди. Шунингдек, кредит олишда амалий ёрдам кўрсатилиб, улардан бирига тикув машинаси ҳадя этилди.
