Аввал хабар берганимиздек, кеча, 22 апрель куни соат 07:07да Қашқадарё вилояти Қарши тумани, “Истиқлол” МФЙда жойлашган Автомобилларга газ қуйиш шохобчасида “NEXIA-1” русумли автомобилига ўрнатилган газ-баллони портлаб кетган. Натижада 1 нафар фуқаро ҳалок бўлган ҳамда шохобчанинг 1 нафар ишчисига тан жароҳати етган.
Мазкур мудҳиш ҳодиса тафсилотлари ҳақида "Замон" дастурида аниқлик киритилди. Унга кўра, машина портлаши натижасида юзага келган талофатлар кўлами кенгаймаслик учун ўша вақтнинг ўзидаёқ фавқулодда вазиятлар бошқармасининг қутқарув гуруҳи етиб келган ва тезкор чоралар кўрилган.
Маълум бўлишича, портлаш кўлами ўта кучли бўлгани сабаб машина умуман яроқсиз ҳолатга келиб қолган. Шунингдек, жабрланган фуқаро ҳам шифохонага оғир аҳволда олиб келинган ва зудлик билан операция қилинган.
