Аввал хабар қилганимиздек, жорий йил 20 апрель куни тушлик вақтида Халқ таълими вазирлиги Матбуот котиби Лайло Рустамова ҳамкасби билан сайр қилиб юрган вақтида Тошкент шаҳар, Шайхонтоҳур тумани, Лабзак маҳалласидан оқиб ўтувчи Анҳор каналида номаълум эркак жасади оқиб кетаётгани гувоҳи бўлган ва дарҳол бу ҳақда Фавқулодда вазиятлар вазирлиги ва Бош прокуратура Матбуот хизматига хабар қилган.
Мазкур ҳодиса қандай бўлгани ҳақида гувоҳлар "Замон" дастури мухбирига сўзлаб беришди.
"Биз тушлик қилиб анҳор бўйлаб юриб кетаётган эдик. Аслида бошқа йўлдан юришимиз керак эди, аммо пешин намозини ўқиб қайтаётган эркаклар кўпайгани боис шу йўлдан юришга қарор қилдик. Бехосдан сув юзида одам танасига ўхшаш нарса сузиб юрганига кўзимиз тушди. Ва билдикки, бу аниқ одам. Бирдан ФВВ ва Бош прокуратура Матбуот хизматлари билан боғландик. Бироқ улар келишигача ҳам қандай қилиб бўлсада шу одамга ёрдам бериш ҳақида қайғурдик, бизда балки тирикдир деган умид бор эди. Шу пайт анҳордан қайиқчилар ўтиб қолди, уларга ҳам кўрсатдик, аммо улар ички ишларга қўнғироқ қилишимизни айтиб ўтиб кетишди. Биз бу пайтда аллақачон тегишли жойларга хабар бериб бўлгандик. Улар етиб келишди ва одам жасадини олиб чиқишди",- дейди гувоҳлар.
Воқеа жойига етиб борган Шайхонтоҳур тумани прокурори раҳбарлигидаги тезкор тергов гурух томонидан мурдани кўздан кечириш жараёнида унда куч ишлатиш холатлари ва тан-жароҳатлари аниқланмаган.
Суриштирув ҳаракатлари давомида жорий йил 21 апрель куни қўл бармоқ изларини текшириш орқали мурданинг шахси аниқланган. Марҳумнинг ўлими сабабини аниқлаш мақсадида суд-тиббий экспертизаси тайинланган.
Ҳолат юзасидан тергов олди текширув ҳаракатлари олиб борилмоқда.
