Ўзбекистон Республикаси Президенти маслаҳатчисининг биринчи ўринбосари Бахтиёр Исламов раҳбарлигидаги ишчи гуруҳ 28 апрель санасида Тошкент шаҳридаги Сирғали, Янгиҳаёт, Яккасарой, Бектемир туманларидаги ҳуқуқий ёрдамга мухтож бўлган фуқаролар учун суд-ҳуқуқ масалалари бўйича сайёр қабул ўтказди.
Бу ҳақда Тошкент шаҳар судининг Жамоатчилик ва ОАВ билан ҳамкорлик бўйича бош консультанти Садоқат Аллаберганова хабар қилди.
Сирғали туман ҳокимиятида ўтган сайёр қабулда фуқаролар суд-ҳуқуқ ва ижтимоий-иқтисодий масалалар бўйича гуруҳларга бўлиниб, Президент маслаҳатчисининг биринчи ўринбосари Бахтиёр Исломов, Судьялар олий кенгаши раиси Холмўмин Ёдгоров, Олий суд раиси ўринбосари Икром Муслимов, Бош прокурор ўринбосари Шухрат Узаков, Адлия вазири ўринбосари Музраф Икрамов, Божхона қўмитаси раиси ўринбосари Гафуржон Шукуров, Ички ишлар вазирлиги тергов департаменти бошлиғининг ўринбосари Ойбек Қулбековнинг қабулида бўлишди.
Хусусан, суд-ҳуқуқ масалалари бўйича фуқароларни Олий суд раиси ўринбосари Икром Муслимов, Тошкент шаҳар суди раиси Эркин Ходжакулов, Тошкент шаҳар маъмурий суди раиси Улуғбек Алмамедов, Тошкент шаҳар суди раиси ўринбосари–фуқаролик ишлари бўйича судлов ҳайъати раиси Шуҳрат Аббасов, Тошкент шаҳар суди раиси ўринбосари – жиноят ишлари бўйича судлов ҳайъати раиси Акбарали Турабов, Тошкент шаҳар суди раиси ўринбосари– иқтисодий ишлар бўйича судлов ҳайъати раисиМақсудбек Саидов ва фуқаролик ва жиноят ишлари бўйича, маъмурий ва иқтисодий судларнинг раислари ва судьялари жами 175 нафар фуқарони қабул қилишди.
Қабул қилинган фуқароларнинг 84 таси жиноят ишлари бўйича,
88 таси фуқаролик ишлари бўйича,
3 таси маъмурий ишлар бўйича судларга оид мурожаатларни ташкил қилди. Шундан:
175 та мурожаатдан 61 таси бўйича ҳуқуқий тушунтиришлар берилди.
79 таси жойида ижобий ҳал этилиб, мурожаатлар қаноатлантирилди.
35 та мурожаат бўйича аризалар Олий суд томонидан кассация тартибида ҳал қилиш учун қабул қилинди. Ушбу мурожаатларнинг барчаси қаноатлантирилиб, тегишли судлов ҳайъатига кўриб чиқиш учун ўтказилди.
79 та мурожаат қуйидагича ижобий ҳал этилди:
Жиноят ишлари бўйича Яккасарой туман суди томонидан 4 нафар,
Жиноят ишлари бўйича Бектемир туман суди томонидан 1 нафар,
Жиноят ишлари бўйича Янгиҳаёт туман суди томонидан 2 нафар – жами 11 нафар шахс жазони ўташдан муддатидан илгари озод қилинди.
5 нафар шахсга нисбатан қўзғатилган маъмурий жавобгарлик тўғрисидаги ишлар суд мажлисида кўрилиб, уларнинг аризаси қаноатлантирилиб, маъмурий жавобгарликдан озод қилинди.
Шунингдек, фуқаролик ишлари бўйича судлар томонидан 11 нафар шахсга нисбатан алимент ундириш юзасидан, 9 нафар шахсга нисбатан иш ҳақини ундириш юзасидан суд буйруғи чиқарилиб, ижрога қаратилди.
2 нафар шахсга нисбатан фуқаролик ишлари бўйича судлар томонидан юридик аҳамиятга эга бўлган фактларни белгилаш бўйича аризаси қаноатлантирилди.
Фуқаролик ишлари бўйича судлар томонидан 2 нафар шахсга нисбатан моддий ва маънавий зарар ундириш ҳақидаги, 7 нафар шахсга нисбатан қарз ундириш тўғрисидаги, 8 нафар шахсга нисбатан таъминот ундириш ҳақидаги, 1 нафар шахсга нисбатан компенсация ундириш ҳақидаги даъво аризалар қаноатлантирилди.
Фуқаролик ишлари бўйича судлар томонидан тарафлар ярашганлиги ва даъвогар даъвосидан воз кечганлиги сабабли меросдан улушни ундириш ҳақидаги 2 та, таъминот ундириш ҳақидаги 4 та фуқаролик иши иш юритишдан тугатилди.
Тарафлар ярашганлиги сабабли 3 та алимент ундириш ҳақидаги суд буйруғи бекор қилинди.
Фуқаролик ишлари бўйича судлар томонидан ажрашиш ёқасига келиб қолган оилалар билан суҳбат ўтказилиб, 15 нафар вояга етмаган фарзанди бор 8 та оила яраштирилди.
Қабулда муаммолари ҳал бўлган 14 нафар фуқаролар Ўзбекистон Республикаси Президенти номига ёзма ташаккурнома билдирди.
ЭСЛАТИБ ЎТАМИЗ:
Ўзбекистон Республикаси Президенти маслаҳатчисининг биринчи ўринбосари Бахтиёр Исламов раҳбарлигидаги ишчи гуруҳ бугун, 29 апрель соат 9:00 да Учтепа туманидаги “Эко боғ” ҳудудида Тошкент шаҳридаги Чилонзор, Учтепа, Олмазор, Шайхонтоҳур туманларидаги ҳуқуқий ёрдамга мухтож бўлган фуқаролар учун суд-ҳуқуқ масалалари бўйича сайёр қабул ўтказади.
