“American Airlines” авиакомпаниясига қарашли Лас-Вегасдан Филадельфия томон парвозни амалга ошираётган самолёт йўловчилари ҳаво кемаси командирининг кутилмаган хабаридан ҳайратга тушдилар. Йўловчилардан бири эса яқинда ота бўлишини эшитиб, шок ҳолатига тушди. Унинг рафиқаси айнан шу ноодатий усул билан ота бўлишидан хабардор қилишга қарор қилган, дея хабар берди “Lifenews.ru” нашри.
Эрик ва Лиза Сэдивник Лас-Вегасдан Филадельфия томон самолётда парвоз қилишаётганда учувчи хабарни эълон қилаётганини видеотасвирга олишган:
“Менга бир мактубни етказишди, ҳозир уни сизларга сўзма-сўз ўқиб бераман, диққат қилинг. Лас-Вегасда катта ютуқни қўлга киритган ғолибларга гуруҳимизнинг ҳам ўз совғаси бор. 29 Е ўриндиқда ўтирган йўловчига эътибор беришингизни сўрайман, у ерда рафиқаси Лиза билан саёҳатга чиққан Эрик ўтирибди. Эрик, сиз Лас-Вегасда жуда катта ютуққа эришмаган бўлсангиз-да, ҳаётда сизга омад кулиб боқди. Табриклаймиз, сиз яқинда ота бўласиз!”, — дея хабар қилган самолёт учувчиси.
Самолёт борти йўловчиларнинг олқиш ва қарсакларига тўлган. Лиза Сэдивик бу видеотасвирни ўтган ҳафта Facebook ижтимоий тармоғидаги саҳифасига жойлаштирган. Уни 60 мингдан ортиқ фойдаланувчи томоша қилган.
