Аввал хабар қилганимиздек, Тожикистон Республикасида 2021 йилнинг 19-22 май кунлари “Ўзбек киноси кунлари” бўлиб ўтиши кутилмоқда.
Мазкур анжуманда иштирок этиш учун Ӯзбекистон киноижодкорлари делегацияси Душанбе шаҳрига етиб келди. Гуруҳ таркибида Ӯзбекистон халқ артистлари Хайрулла Саъдиев, Теша Мӯминов, Ӯзбекистонда хизмат кӯрсатган артист Тоҳир Саидов, Ӯзбекистонда хизмат кӯрсатган маданият ходими Жаҳонгир Аҳмедов каби таниқли кино арбобларт бор.
Ўзбекистон Республикаси Кинематография агентлигидан маълум қилишларича, мазкур анжуманда тожикистонлик мухлисларга ўзбек киноусталари томонидан яқинда суратга олинган “Илҳақ”, “Рангсиз тушлар”, “Халқ юраги”, “Ҳамкорлик бўйича навбатчи”, шунингдек ўзбек киноси нодир дурдоналарига айланган “Келинлар қўзғолони”, “Сирли сандиқ” сингари фильмлар намойиш қилинади.
“Ўзбек киноси кунлари”нинг очилиши 19 май куни кеч соат 19.00 да Душанбе шаҳридаги “Наврўз” саройида бўлиб ўтади. Анжуман дастуридан ўзбек киноижодкорлари билан учрашувлар, ўзаро ҳамкорлик лойиҳалари, тарихий обидаларга саёҳат ва бошқа кўнгилочар тадбирлар ўрин олган.
Шунингдек, мазкур анжуман доирасида Ўзбекистон маданий меросини асраш, ўрганиш ва оммалаштириш Бутунжаҳон жамиятининг махсус лойиҳаси – “Ўзбекистон маданий мероси жаҳон тўпламларида” туркумидан чоп этилган китоб-альбомларнинг ҳам тақдимоти ўтказилади.
