Коронавирусга қарши вакцина олишдан олдин ва кейин қанча муддат ҳомиладорликдан сақланиш керак? Ушбу саволга акушер-гинеколог шифокор Барно Исломова жавоб беради.
- Умуман коронавирусга қарши вакцинани 18 ёшдан кичик ва ҳомиладор аёлларга қўллаш таъқиқланади. Ҳатто, вакцинанинг қадоғида ҳомиладор аёлларга қарши кўрсатмалар ёзилмаган бўлса ҳам. Негаки клиник тадқиқотлар давомида ҳомиладор аёлларга вакцинанинг таъсир даражаси ўрганилмаган. Шу сабабли ҳомилага зиён етказиши ёки етказмаслиги тўғрисида аниқ бир фикр айтиш қийин. Вакцина олишдан аввал ҳомиладорликка гумон бўлганда, керакли текширувлардан ўтишлари ва аниқ ташхис қўйилиши зарур.
Демак, аёл охирги вакцина билан эмлангандан сўнг 3 ойдан то 6 ой муддатгача ҳомиладорликни режалаштирмаслиги тавсия этилади. Негаки вакцина олингач, организмда Covid-19 га қарши антитаначалар пайдо бўлиши учун вақт керак.
Ҳомиладор бўлиш учун ҳар бир аёл алоҳида тайёргарлик кўрсалар, мақсадга мувофиқ бўларди. Худди шундай коронавирусдан вакцина билан ҳимояланишдан ташқари кам қонлик (анемия) ҳамда ТОРЧ инфекцияси учун ҳам таҳлил синамасини топширишларини маслаҳат берган бўлардим. Айнан ушбу текширув орқали ҳомилага таъсир этувчи инфекция бор йўқлигига аниқлик киритилади.
