"Севимли" телеканалининг "Замон" дастурига Самарқанд шаҳридаги мактабларнинг бирида фаррош бўлиб ишлаётган 52 ёшли аёлдан мурожаат келиб тушган. Унда баён этилишича, аёл турмуш ўртоғининг ўлимидан кейин ўз қайнсингиллари томонидан фарзанди билан уйидан ҳайдаб чиқарилган.
Натижада аёл ҳеч қандай шароитларга эга бўлмаган, яшашга яроқсиз ташландиқ уйда фарзанди билан ҳаёт кечиришга мажбур бўлмоқда. Мурожаатни ўрганган мухбир масъуллар билан суҳбатлашди, уларнинг эътиборини турмуш сўқмоқларида ўзи ва фарзанди ҳаёти учун ёлғиз курашаётган ожиза аёл аҳволига қаратди.
Самарқандлик мурожаатчи Саодат Саидова бундан 16 йил аввал шаҳарнинг Хўжақишлоқ маҳалласига яшовчи эркакка турмушга чиқади. Камтарона ҳаёт кечирсада, унга тоғдек далда бўлувчи турмуш ўртоғи ва соя бўлгувчи бошпанаси бор эди.
Таъкидланишича, аёл қайнсингиллари томонидан мунтазам тайзиқлар остида яшаган. Уни уришган, кўчага ҳайдашган. 3 йил Пайариқ туманидаги бир инсонга ғамҳўрлик қилиб, унинг уйидан бошпана сифатида фойдаланган. Жорий йилнинг январида турмуш ўртоғи шифохонадан чиққач, яна ўзи уйига қайтган. Эрининг вафотидан кейин бутунлай кўчага ҳайдалган.
Маҳалла фуқаролар йиғини раисининг айтишича, марҳум эркакнинг бундан аввалги оиласидан ҳам 2 фарзанди бўлган. Хонадондаги уруш -жанжаллар бирор нохуш ҳодисани келтириб чиқармаслигининг олдини олиш мақсадида аёл фарзанди билан бир ой аввал шу "капа"га жойлаштирилган. Унга фуқаролик судига мурожаат қилиб, қонуний улушини ажратиб олиш йўллари тушунтирилган.
Мухбирнинг чақируви билан мурожаат жойига келган вилоят Маҳалла ва оилани қўллаб-қувватлаш бошқармасининг бошлиғи эса ҳолатдан ҳангу-манг. У Ўзбекистоннинг иккинчи пойтахти бўлмиш, Самарқанд шаҳрида шу аҳволда яшаётганлар борлигидан ҳайратда. Аёлнинг бу аҳволда яшаётганида маҳалла фуқаролар йиғинининг айби катталини айтган.
Ғурбат-ташвишлар ичида улғаяётган қизнинг орзулари олам. Ундаги чиройли яшашга бўлган умидлар ҳали сўнмаган...
