Тожикистонда ўтаётган Ўзбекистон киноси кунлари иштирокчилари Душанбе шаҳридаги Тожикистон Миллий музейига ташриф буюришди.
Мазкур музей нафақат Тожикистон, балки Марказий Осиё халқларининг ўтмишини ўзида акс эттирувчи масканлардан бири саналади. Бу ерда 2011 йилда ташкил топган музейнинг умумий майдони 24 минг квадрат метрни ташкил қилади. 22 та экспозицияда минглаб ноёб экспонатлар сақланади. Музейда Тожикистон ҳудудидан топилган қадимги нодир буюмлар, қўлёзмалар, тангалар, қурол-аслаҳалар, уй-рўзғор буюмлари, амалий ва тасвирий санъат намуналари ўрин олган.
Буюк саркарда Заҳириддин Муҳаммад Бобур томонидан бугунги Масчоҳ тумани ҳудудида шоҳ байтлар битиб қолдирилган тош киноижодкорларда қизиқиш уйғотди. Бу тошдаги битиклар Бобурнинг оғир дамларида, саргардонлик пайтида битилган.
Музейда “Ўзбекистон маданий мероси дунё тўпламларида” китоб-альбомларининг тақдимоти ҳам ўтказилди. Мазкур китоб-альбомлар Ўзбекистонда яратилган ва турли сабабларга кўра, дунёнинг турли ҳудудларига бориб қолган осори атиқалар ҳақида ҳикоя қилади.
– Бу альбомларимиз бугунги кунда Марказий Осиё ҳудудида яшаётган барча халқларнинг муштарак қадриятлари, турмуш тарзи, маданияти ва урф одатлари ҳақида ҳикоя қилади, – деди мазкур лойиҳа муаллифи Ф.Абдухолиқов. – Биз келгусида Тожикистон Миллий музейи билан ҳамкорликда ана шундай лойиҳаларни амалга оширишга умид қиламиз.
Музей директорининг ўринбосари Зафаршо Иброҳимзода меҳмонларга ташриф учун миннатдорлик билдириб, ҳамкорликка ҳар доим тайёр эканини маълум қилди.
