“Қуёш лаззати” фильми Тошкентда суратга олинмоқда

Ўзбекистон Кинематография агентлиги ҳамда Россиянинг “Спутник Восток Продакшн” кинокомпанияси билан ҳамкорликда “Солнце на вкус” (“Қуёш лаззати”) ко-продукция фильми суратга олинмоқда. Бухоро ва Самарқанд вилоятларидаги суратга олиш ишларидан сўнг хорижий киноижодкорлар Тошкентда ўз ишларини давом эттиришмоқда. Бу ҳақда Кинематография агентлиги Ахборот хизмати хабар берди. 

Саргузашт, фентези жанридаги ушбу фильм ко-продукция шаклидаги илк ҳамкорликдаги лойиҳаларидан биридир. Фильмни суратга олаётган “Спутник Восток продакшн” кинокомпанияси сўнгги йиллар дунёдаги йирик стриминг хизмати Netflix билан яқин ҳамкорлик алоқаларини ўрнатган.  

Ҳозирда “Қуёш лаззати” картинасини ҳам Netflix платформасида тақдим этиш бўйича музокаралар олиб бориляпти. Сўнгги йилларда Кинематография агентлиги хорижий кинокомпаниялар билан ко-продукция усулида ишлашни кенг миқёсда йўлга қўйди. Бундай лойиҳаларда ўзбекистонлик ижодкорлар ва айниқса, ёшларнинг иштирок этаётгани тажриба тўплаш ва малака ошириш имконини тақдим этмоқда. Бундан ташқари бу каби лойиҳалар Ўзбекистонни дунё экранлари орқали дунёга танитишда улкан аҳамият касб этади.  

Фильмда Ўзбекистонга саёҳати давомида саргузаштлар уммонига тушиб қолган оддий москвалик оила ҳақида ҳикоя қилинади. Шунингдек, Бухоро амири хазинасини излаш, уни таъқиб қилиш, дўстлик мавзуси, оилавий можаролар тасвирланади.  

Постановкачи режиссёр Эльдар Салаватов, рассом Юрий Фоменко, продюсерлар Александр Кессель ва Фирдавс Абдухолиқов, режиссёр Татьяна Суляева. Сценарий эса россиялик таниқли сценарист Олег Маловичкога тегишли. Айтиб ўтиш жоизки, “Троцкий”, “Метод” сериаллари ва “Союз спасение”, “Притяжение”, “Ёлки” каби фильмларни сценарийсини ёзган Маловичко куни кеча Россиянинг Top5 энг яхши сценаристлари рўйхатида 3 ўринни эгаллади.

Фильмда ўзбек ва рус юлдузлари ҳам иштирок этишади: Андрей Мерзликин, Александр Ильин, Муҳаммадисо Абдулхаиров ва бошқалар.

Суратга олиш ишлари Москва, Бухоро, Самарқанд, Тошкент шаҳри ва вилоятида бўлиб ўтади. Съёмка жараёнлари нафақат Чорвоқ каби гўзал ландшафтлар, балки Ўзбекистоннинг тарихий ёдгорликлари: Регистон, Гўри Амир, Самарқанддаги Мирзо Улуғбек расадхонаси, Бухородаги Арк қалъа-музейи, масжид ва Минораи Калонда бўлиб ўтди.

“Солнце на вкус” кинокартинаси 2021 йилнинг куз мавсумида премьера қилиниши режалаштирилган. Хорижий студия ва агентлик ўртасидаги келишувга асосан фильмнинг дунё прокатидан тушган фойданинг 25 фоизлик улуши Кинематография агентлигига тегишли ва Ўзбекистонда намойиш этиш бўйича барча ҳуқуқлардан фойдаланади.