"Tashkent City" да 11 июнь оқшомида пойтахтимизда ўтказиладиган “Профессионал бокс кечаси” олдидан боксчиларни тарозига тортиш маросими, кўз уриштириш ҳамда матбуот анжумани ташкил этилди.
“Юнусобод” спорт мажмуасида ташкил этиладиган “Профессионал бокс кечаси”да қуйидаги жуфтликлар рингда ўзаро куч синашади:
Дастлаб, “Профессионал бокс кечаси”нинг асосий иштирокчилари тарозига тортилди ва кўз уриштиришади. Эътиборлиси, барча спортчилар белгиланган вазндаги оғирликни қайд этишди.
Шундан сўнг тадбирга йиғилган оммавий ахборот воситалари ходимлари ҳамда профессионал бокс ишқибозлари, қайсики Шоҳжаҳон Эргашевнинг мухлислари учун матбуот анжумани ташкил этилди.
Александр Салтыков (Россия) – Ўзбек халқининг меҳмондўстлиги ҳақида кўп эшитган эдим, бу сафар бунга ўзим гувоҳ бўлдим. Халқингизнинг маданиятига, меҳмондўстлигига ва самимийлигига қойил қолдим. Ҳеч муболағасиз айтишим мумкин, мен ўзим учун яна бюир севимли масканни кашф қилдим. Ўйлайманки, “Профессионал бокс кечаси” ҳам юқори савияда ташкил этилади ва мухлислар кетган вақтига асло ачинмаслигига ишонаман.
Женго Йоеза Салиму (Танзания) – Шоҳжаҳон Эргашевга қарши кечадиган жанг борасида ортиқча гапирмоқчи эмасман. Умид қиламанки, “Профессионал бокс кечаси”нинг ташкилий жиҳатларида муаммо бўлмайди. Бўлажак жангга қандай тайёргарлик кўрганимни эса ринг кўрсатиб беради.
Шоҳжаҳон Эргашев (Ўзбекистон) – Кўпчилик мендан сўрашади, нега ҳалигача чемпионлик жангида иштирок этмагансиз, қачон камар учун жанг қиласиз, деб. Биласизми, профессионал боксда бу нарсалар билан спортчи эмас, промоутерлар шуғулланишади. Афсуски, мен ҳамкорлик қилган промоутерлик компанияси шу пайтгача чемпионлик жангини ташкил қилолмади. Ўзим билан содир бўлган вазиятни кўриб, қолаверса ортимдан менга ҳавас қилиб профессионал боксга кириб келаётган ёшлар билан ҳам шундай муаммолар туғилишининг олдини олиш мақсадида ўзимнинг промоутерлик компаниямни ташкил этдим. Ҳозирда компаниям чемпионлик жангимни қисқа муддатларда уюштириш борасидаги саъй-ҳаракатларни бошлаб юборган. Тошкентда бўладиган жангимга келсак, илк маротаба ота-онам, яқинларим, юртдошларим кўз ўнгида жанг қиляпман, ҳаяжон кучли. Спортчи учун ўз юртидан кўра четда жанг қилиш осон экан. Яна бир гап, эртанги жангда отам ёнимда бўлади. Уларни олдида, мухлисларимнинг қўллаб-қувватлаши остида фақат ғалаба учун жанг қиламан. Рақибим ҳақида қисқача гапирадиган бўлсам, Салиму ҳам, мен ҳам ҳужумкор бокс намойиш этамиз. Эртага ким биринчи бўлиб ортга чекинар экан, бу савол ўзим учун ҳам қизиқ. Аммо, шуни ишонч билан айтишим мумкин, юртдошларим кўз ўнгида асло ортга чекинмайман.
Шундан сўнг боксчилар иштирокида мастер-класс намойиш этилди.
Эслатиб ўтамиз, 11 июнь оқшомига белгиланган жанглар соат 19:00дан “Юнусобод” спорт мажмуасида бошланади.
