Бугун 22 июнь куни Кинематография агентлигида “Ҳужжатли ва хроникал фильмлар киностудияси” ДУК томонидан суратга олинган "Матонат" ҳужжатли фильмининг ўзбек ва рус тилларидаги премьераси ўтказилади. Бу ҳақда Кинематография агентлиги Ахборот хизмати хабар берди.
"Матонат" фильми Агентлик ва Самарқанд вилояти ҳокимлиги билан ҳамкорликда суратга олинган. Ушбу ҳужжатли фильм II жаҳон урушида қатнашган 101 ўзбекистонлик юртдошимиз ҳақида бўлиб, фильм урушда Ғалабага қўшган ҳиссаси ҳамда Голландиянинг Амерсфорт шаҳрида жойлашган концлагерларда ҳалок бўлган ўзбек аскарларига бағишланади.
Фильм режиссёри Шуҳрат Маҳмудов, сценарий муаллифи Розиқа Мергенбаева, операторлар Рифқат Ибрагимов, Рустам Магадиев, рассом Бектош Ражабов.
Кинематография агентлиги ташаббуси билан май ойида ўтказилган киноҳафталик доирасида Тошкент ва Самарқандда ушбу ҳужжатли фильмнинг катта намойиши бўлиб ўтган эди.
Премьерага киномутахассислар, таниқли киноижодкорлар, ОАВ вакиллари ва ёшлар таклиф этилган.
