Кинематография агентлиги буюртмасига биноан «Ёшлик киностудияси» ДУК томонидан суратга олинган, «Дебют-2020» ёшлар киноалманахидаги 18 та фильмлардан бири бўлган «Чана» қисқа метражли фильми Буюк Британиянинг Бунтингфорд шаҳрида ўтказилган «Бунтингфорд қисқа метражли фильмлар фестивали»да махсус диплом билан мукофотланди. Бу ҳақда Кинематография агентлиги Ахборот хизмати хабар берди.
Мазкур кинофестиваль асосан талабалар учун мўлжалланган бўлиб, унда турли жанрдаги қисқа метражли фильмлар баҳоланади. Профессионал ва ҳаваскорлик даражасидаги кинокартиналар кўриб чиқилади.
“Чана” фильмининг сценарий муаллифи ва постановкачи режиссёр Сухроб Қодиров, постановкачи оператор Нортой Йўлдошев, рассом Алишер Тўлабоев, композитор Убайдулло Каримов, иккинчи режиссёр Дилшод Усмонов, бадиий раҳбар Шуҳрат Ризаев.
Маълумот учун, мазкур фильм жорий йилнинг 1-5 июнь кунлари Россиянинг Ярославль шаҳрида бўлиб ўтган «Свет миру» халқаро ёшлар кинофестивалида махсус диплом билан мукофотланган эди.
