Спортчиларимизни Токиода бўлиб ўтадиган Олимпия ўйинларига тайёрлаш бўйича ҳар бир атлетимизга алоҳида эътибор қаратилмоқда. Ўзбек ва жаҳон спорти афсонаси Оксана Чусовитинанинг ҳам Олимпиадага муносиб тайёрланиши муҳимдир. Шу сабабли, Токио-2020 лицензиати, ҳамюртимиз Чусовитина, германиялик мутахассис Дитер Кох билан ҳамкорликда иш олиб бормоқда. Дитер Кох спорт гимнастикаси бўйича улкан тажрибага эга бўлган мураббий ҳисобланади. Унинг қўл остида Германия ва Буюк Британия жамоалари турли йилларда жаҳон чемпионати ва Олимпия ўйинларига тайёрланган. Келишувга кўра, Кох спортчимизнинг шахсий мураббийи ҳисобланади ва Токио Олимпиадасига Чусовитинани ўзи тайёрламоқда. Келишув Олимпия ўйинлари якунига қадар амал қилади. Қуйида эса биз латофатли ва афсонавий гимнастикачимиз билан қилинган махсус суҳбатимизни сиз билан бўлишамиз.
— Айни кунларда Германияда машғулот олиб боряпман. Чунки биз тайёрланадиган машғулот зал COVID марказига айлантирилган эди. Шу сабабли, бизга ана шундай имконият яратилди. Бунинг учун эса Ўзбекистон Миллий олимпия қўмитасига миннатдорчилик билдираман. Бу ерда яратилган имкониятлар аъло даражада.
— Токио-2020 олимпиадаси кун сайин яқинлашмоқда ва биламизки, унда сиз ҳам иштирок этасиз...
— Мен олимпиада ўйинларига пухта тайёргарлик кўряпман. Бу катта спорт мусобақасида ватаним шарафини ҳи[1]моя қиламан. Пандемия сабаб олимпиада 2021 йилга кўчирилди. Албатта, бундан биз ҳам хафа бўлдик. Аммо умидимизни узганимиз йўқ. Чунки бутун дунё пандемияни бошидан ўтказяпти. Муҳими менда мақсад, истак, орзу бор. Шундай экан, қўлимдан келганича ҳаракат қиламан.
— Олимпиададан қандай натижаларни кутяпсиз?
— Олимпиададан бирор натижа кутишга ҳали эрта. Ўзини ҳурмат қиладиган ҳар бир спортчи унда юқоринатижаларга эришишни истайди. Шу қаторда мен ҳам. Боя юқорида таъкидлаганимдек, бунинг учун астойдил тайёргарлик кўряпман.
— Токио мезбонлик қиладиган мазкур ўйинлардан сўнг, сизни яна Олимпиадаларда кўрамизми?
— Йўқ. Бу менинг Олимпиада ўйинларидаги охирги иштироким бўлади. Бундан кейин Ўзбекистонда спортни ривожлантириш борасида олиб борилаётган ишларга ўз ҳиссамни қўшаман. Клуб (спорт билан шуғулланувчилар учун зал) очишни режалаштирганман. Унда турли ёшдаги болалар иштирок этиши мумкин.
— Шогирдлар тайёрлаяпсизми? Улардан Оксана кўрсатган натижаларни кута оламизми?
— Айни пайтда шогирдлар тайёрламаяпман, чунки бор эътиборимни ва тайёргарлигимни Олимпиадага қаратганман.
— Оддий инсон сифатида ўзингиз қайси спортчига мухлислик қиласиз?
— Спортнинг бир нечта турига ишқибозман, севиб томоша қиламан. Шу сабабли ҳам айни бир спортчига мухлислик қиламан, деб айта олмайман.
— Сиз дунёда машҳур спортчисиз. Аммо оилада сиз ҳам барча аёллар каби рафиқа, она ва оддий бекасиз. Шундай экан, спорт ва оилани бирга олиб бориш қийин кечмайдими?
— Мен жуда бахтли аёлман. Турмуш ўртоғим ҳар жабҳада мени қўллаб-қувватлайди, ёрдам беради. Мени яхши кўрадиган ўғлим бор. Оилада муҳаббат, истак, ўзаро тушуниш бўлса, у оила, албатта, бахтли бўлади. Оилам мени доим қўллаб-қувватлайди, бахтимиз сири ҳам ана шунда, деб ўйлайман. Такрор айтаман, мен энг бахтли аёл ва онаман.
— Ҳаётда қандай шиорга амал қиласиз?
— “Эртага пушаймон қилмаслик учун бугун ҳаракат қил ёки уриниб кўр!” деган шиорга амал қиламан.
— Мухлисларингиз ва муштарийларимизга тилакларингиз бўлса...
— Газета муштарийларига мустаҳкам соғлик ва эзгуликлар тилайман. Биз спортчиларга мухлислик қилишаётгани ва бизни қўллаб-қувватлашганлари учун ташаккур. Албатта бу ишончни оқлаш учун ҳаракатдамиз.
МАЪЛУМОТ УЧУН:
Оксана Александровна Чусовитина 1975 йил 19 июнь куни Бухоро шаҳрида туғилган.
Жаҳонда спорт гимнастикаси бўйича Олимпия ўйиларида энг кўп иштирок этган спортчи (1992, 1996, 2000, 2004, 2008, 2012, 2016).
1992 йил Барселонада ўтган Олимпия ўйинлари олтин медали соҳиби, 3 карра жаҳон чемпиони.
Оксана Чусовитина спорт билан шуғулланишни 8 ёшида бошлаган. Узоқ йиллар давомида Светлана Кузнецова қўл остида спорт гимнастикасининг сир-асрорларини ўрганиб келган. 1990 йил терма жамоа аъзосига айланган.
Таяниб сакраш, эркин машқ ва параллел тўсинларда бир неча мураккаб элементлар муаллифи. Қаҳрамонимиз Осиё ўйинлари ва Осиё чемпионати ғолиби.
Фаолиятини якунламасдан туриб, гимнастиканинг ривожига қўшган ҳиссаси учун Халқаро гимнастика шон-шараф залидан ўрин олган ягона спортчи ҳисобланади. Шунингдек, спорт гимнастикасида Олимпия ўйинларида энг кўп иштирок этгани учун унинг номи “Гиннеснинг рекордлар китоби”дан жой олган.
2019 йил Германиянинг Штутгарт шаҳрида ўтказилган спорт гимнастикаси бўйича жаҳон чемпионатидаги иштироки орқали Токио-2020 Олимпия ўйинларига йўлланма олди. Токио Олимпиадаси Чусовитина учун фаолиятидаги саккизинчи Олимпиада бўлади.
ДАВЛАТ МУКОФОТЛАРИ:
• 1996 йил: “Дўстлик” ордени;
• 2001 йил: “Меҳнат шуҳрати” ордени;
• 2017 йил: “Эл-юрт ҳурмати” ордени;
• 2020 йил: “Ўзбекистон ифтихори” фахрий унвони.
Оксана Александровна фаолияти давомида қуйидаги унвонларга сазовор бўлган:
1990 йил: Собиқ Иттифоқда хизмат кўрсатган спорт устаси;
1992 йил: Ўзбекистон Республикасида хизмат кўрсатган спортчи.
Учқун НАМОЗОВ тайёрлади, "Даракчи" 25 (1152) 24 ИЮНЬ 2021 Й.
