2 июль куни Ўзбекистон Республикаси Марказий сайлов комиссияси раҳбари Зайниддин Низамходжаев бошчилигида навбатдаги мажлис бўлиб ўтди. Унда Ўзбекистон Республикаси Президенти сайловига тайёргарлик кўриш ва уни ўтказиш билан боғлиқ норматив-ҳуқуқий ҳужжатларига ўзгартиш ҳамда қўшимчалар киритишга доир масалалар муҳокама қилинди. Бу ҳақда Марказий сайлов комиссиясининг матбуот хизмати хабар бермоқда.
Пандемия шароитига қарамасдан бу йил ҳам Сайлов кодексининг 10-моддасига биноан, Ўзбекистон Республикасининг чет давлатлардаги дипломатик ва бошқа ваколатхоналари ҳузурида сайлов участкалари тузилиши мумкин.
Қайд этилишича, чет давлатларда истиқомат қилиб турган Ўзбекистон фуқароларини дипломатик ваколатхоналарнинг консуллик ҳисобида бўлиши ёки бўлмаслигидан қатъи назар, сайловчилар рўйхатига киритиш тартиби, хорижий мамлакатларда улар яшаётган ёки ишлаётган жойида кўчма қутилар орқали овоз беришининг ҳуқуқий асослари янада мустаҳкамланади.
