Дунё миқёсида қисқа фурсатда ана катта эътирофга эришган текбол тез орада Ўзбекистонга ҳам кириб келди. Бу ҳақида аввалроқ хабар берган эдик. Ушбу спорт турини янада ривожлантириш мақсадида, Расмий федерация ҳам фаолият олиб бормоқда.
Айнан шу борада, 2021 йилнинг 5 июль куни Тошкент шаҳар, Учтепа туманидаги 38-сонли умумтаълим мактабида “Текбол” спорт турининг жиҳозларини қабул қилиб олиш тантанали маросими бўлиб ўтди. Халқ таълими вазирлиги ахборот хизмати буни маълум қилди.
Хабарда айтилишича, тадбирда Халқ таълими вазирлиги, Ўзбекистон Миллий Олимпия қўмитаси, Жисмоний тарбия ва спорт вазирлиги ҳамда Ўзбекистон текбол федерацияси вакиллари иштирок этган.
Шунингдек, Ўзбекистон текбол федерацияси раиси томонидан илк босқичда республикамизнинг барча ҳудудларидаги умумтаълим мактабларига 100 дона текбол спорт жиҳозларини топшириш бўйича Халқ таълими вазирлигига сертификат топширилди. Текбол федерацияси томонидан янги спорт турини таништириш бўйича тақдимот ташкил этилгани ҳам айтилмоқда.
