Аввалроқ, Тошкентдаги метро қурилишида 899 миллион сўм талон-торож қилингани ҳақида хабар берган эдик.
“Ўзбекистон темир йўллари” AЖ ташкилот мутасаддиларининг ўғирликка алоқаси йўқлигини айтмоқда.
Хабарда айтилишича, “Ўзбекистон темир йўллари” AЖ томонидан 2019 йилда Тошкент метрополитени ер усти ҳалқа йўлининг биринчи босқичи бўлган 11 километрлик “Дўстлик-2” – “Қўйлиқ” участкасида қурилиш ишлари бошланган. Ушбу лойиҳа қурилиши 2020 йилнинг март ойида тўлиқ тугатилиб, фойдаланиш учун топширилишга тайёр эди. Бироқ бутун дунёда кенг тарқалган COVID-19 касаллигининг юртимизга кириб келиши оқибатида карантин чоралари кучайтирилиши мазкур йўналишнинг очилиши номаълум вақтга қолдирилган. Қурилишда иштирок этган барча ишчи-хизматчилар карантин чоралари юмшатилгунга қадар ўзларини изоляция қилишган.
2020 йилнинг 3 июль куни, “Ўзбекистон темир йўллари” AЖга қарашли “1-сонли Энергомонтаж поезди” унитар корхонаси ходимлари Тошкент метрополитенининг ер усти “Дўстлик-2” – “Қўйлиқ” участкасини кўрикдан ўтказишганда, моддий товар (кабел маҳсулотлари)нинг ўз жойида йўқлиги аниқланган ва ушбу ҳолат бўйича зудлик билан Ички ишлар вазирлиги Транспортда хавфсизликни таъминлаш бош бошқармасининг ҳуқуқни муҳофаза қилувчи орган ходимларига ариза шаклида мурожаат қилинган (ариза илова қилинмоқда).
Дастлабки тергов натижаларига кўра, умумий қиймати 899 131 590 сўмлик кабел маҳсулотлари номаълум шахслар томонидан ўғирланган. Олиб борилган тергов ҳаракати натижаларига кўра, айбдор шахслар ҳамда йўқолган моддий товар (180 962 364 сўмлик) топилиб, Ўзбекистон Республикаси Жиноят кодексининг тегишли моддаларига биноан жиноятчилар ўрнатилган тартибда жавобгарликка тортилган. Бугунги кунда етказилган 180 962 364 сўмлик зарар айбдорлардан тўлиқ ундирилган.
Aйни пайтда ушбу ҳолат юзасидан Ўзбекистон Республикаси Ички ишлар вазирлиги Транспортда хавфсизликни таъминлаш бош бошқармаси томонидан тергов ва қидирув ишлари давом этмоқда.
